ڕۆژنامەی بریتانیایی «تێلێگراف» لە ڕاپۆرتێکدا ئاشکرای کردووە کە کۆماری ئیسلامیی ئێران دوای هەوڵەکانی بۆ دەستێوەردان لە هەڵبژاردنەکانی ئیسرائیل، ئێستا خەریکی ئامادەکاری بۆ ئەنجامدانی ئۆپەراسیۆنێک بە مەبەستی دروستکردنی ئاستەنگ و پەکخستنی هەڵبژاردنە نێوان دەورەییەکانی ئەمریکایە.
بە وتەی چەند بەرپرسێکی ئێرانی بۆ ئەم ڕۆژنامەیە، تاران بەڕێوەچوونی هاوکاتی هەڵبژاردنەکان لە ئەمریکا و ئیسرائیل بە دەرفەتێکی دەگمەن دەزانێت بۆ دروستکردنی کەلێن، دابەشبوونی سیاسی و بنبەست لە پێکهاتەی سیاسیی هەردوو وڵاتدا، تاکوو بەم شێوەیە گوشارە جەنگییەکان لەسەر خۆی کەم بکاتەوە.
یەکێک لە بەرپرسەکان ئاماژەی بەوە کردووە کە گرووپی سایبێریی بەهێزیان بۆ هاککردنی سیستەمەکانی هەڵبژاردن، بانکی و گواستنەوە پێکهێناوە. ناوبراو جەختی کردووەتەوە کە تاران پشتیوانی لە هیچ بەربژێرێک ناکات، بەڵکو تەنیا ئامانجی دروستکردنی ئاڵۆزی و نانەوەی دووبەرەکی لە ناوخۆی ئەمریکا و ئیسرائیلدایە.
