سپای تێرۆریستیی پاسداران ئەمڕۆ شەممە ٩ی خەزەڵوەر بە تۆپبارانکردنی چیای شاهۆ و گرتنی ڕێگای کامێران ـــ تیلەکۆ و پشکینی کەلوپەلی کەسیی خەڵک، کەشێکی ترسێنەری دروست کردووە و دەستی بە ئازار و ئەزیەتدانی خەڵک کردووە.
بەپێی ئەو زانیارییانەی بە بەشی هەواڵی ناوەندی ڕاگەیاندنی حیزبی دێموکراتی کوردستانی ئێران گەیشتوون، سپای پاسداران گوشاری خستووەتە سەر ئاواییەکانی کامێران و مەڕدارانی دەوروبەری چیای شاهۆ و ئەو ناوچانەی پێ چۆڵ کردوون، هەتا مانۆڕی سەربازیی تێدا بەڕێوە ببات.
بەپێی ئەو زانیارییانە، بەهۆی ئەو مانۆڕە سەربازییەوە، زۆرێک لە لەوەڕگە و ژینگەی ناوچەی کامێران و چیای شاهۆ ئاگری گرتووە و زیانێكی زۆری ژینگەیی لێکەوتووەتەوە.
هەروەها لە ڕێگەی تیلەکۆ ــ کامێران ئەو هێزە تێرۆریستییەی ڕێژیم، خاڵی پشکنینی چڕی داناوە و هەموو ماشینێک دەپشکنن و ئازار و ئەزیەتیی خەڵک دەدەن.
پێشتریش سپای پاسداران بە بەڕێوەبردنی وەها مانۆڕگەلێک، ئازار و ئەزیەتیی خەڵکی شارەکانی دیکەی کوردستان بەتایبەت ناوچە سنوورییەکانی داوە و هەتا ئێستاش لەو جۆرە مانۆڕ و هەڵسوکەوتانە بەردەوامە.
