ڕۆژی یەکشەممە ١٧ی خەزەڵوەری ١٤٠٥ی هەتاوی، دایە زوڵەیخا بایزیدی، ژنە نیشتمانپەروەر و دایکی شەهید خالید ساڵحیان ناسراو بە "ناسر"، خەڵکی ئاوایی گردکسپیان سەر بە ناوچەی لاجانی پیرانشار، بەهۆی پیری و بەساڵاچوییەوە، لە تەمەنی ٨٦ ساڵیدا کۆچی دوایی کرد.
دایە زوڵەیخا، ژنێکی هوشیار، حیزبدۆست و پێشمەرگەخۆشەویست بووە و لە هیچ خزمەتێک بە تێکۆشەرانی حیزبی درێغی نەکردووە.
کوڕێکی ناوبراو بە ناوی شەهید خالید ساڵحیان ناسراو بە ناسر، لە ساڵی ١٣٤٣ی هەتاوی لە ئاوایی گرتکسپیان لەدایک بووە و لە ڕێکەوتی ٥ی سەرماوەزی ١٣٦٢ی هەتاوی لە شوێنێک بە ناوی زمێ لە تێکهەڵچوونێک لە هێزەکانی ڕێژیمی کۆماری ئیسلامی شەهید بووە و تێکەڵ بە کاروانی نەمرانی گەل بووە.
دایە زوڵەیخا هەتا دوایین ساتەکانی ژیانی بە سەربەرزی و ڕووسووری ژیا و هەموو شانازییەکی شەهیدبوونی کوڕێکی لە ڕێگای ڕزگاریی گەل و نیشتمانەکەی بوو.
تەرمی ناوبراو لەنێو ئاپۆڕای خەڵکی ناوچەی لاجان و لە ئاوایی گردکسپیان بە خاکی پیرۆزی کوردستان سپێردرا.
ناوەندی ڕاگەیاندنی حیزبی دێموکراتی کوردستانی ئێران، بەم بۆنەوە پرسە و سەرەخۆشی لە بنەماڵە و کەسوکاری ناوبراو دەکات و خۆی بە هاوبەشی خەمیان دەزانێت.
