بەپێی ئەو زانیارییانەی بە بەشی هەواڵی ناوەندی ڕاگەیاندنی حیزبی دێموکراتی کوردستانی ئێران گەیشتووە، ئەمیر عەشایری، فرمانداری مەهاباد، لە بڕیارێکدا بەڵێنەکانی پێشووی خۆی بۆ پشتیوانیکردن لە کرێکارانی وەرزی نەبردووەتە سەر و سەدان کرێکاری وەرزی و ژنانی ماڵداری بێهیوا کردەوە کە بۆ دابینکردنی بژێویی ژیانیان ڕوویان لە کاری سێوچنین کردبوو.
ناوبراو پێشتر بەڵێنی دابوو کە نرخی کرێی ڕۆژانەی کرێکارانی سێوچن ۲ میلیۆن و ۵۰۰ هەزار تمەن بێت، بەڵام لە ڕۆژی دیاریکردنی فەرمیی نرخدا، ئەم بڕە پارەیەی بۆ بڕی ۷۰۰ هەزار تمەن کەم کردەوە و نرخی ڕۆژانەی بە ۱ میلیۆن و ۸۰۰ هەزار تمەن پەسەند کرد.
ئەم بڕیارەی عەشایەری ناڕەزایەتییەکی توندی کرێکارانی وەرزی بەتایبەت ژنانی لێ کەوتووەتەوە.
کرێکارانی وەرزی و ژنانی هەژار کە بەهۆی گرانی و هەژارییەوە بۆ یارمەتیدانی هاوسەرەکانیان و دابینکردنی پێداویستییە سەرەتاییەکانی ژیان ڕوویان لەو کارە پڕزەحمەتە کردبوو، بە توندی ڕەخنەیان لەم هەڵوێستەی فرماندار گرت و بە درۆزن ناوی دەبەن.
ئەو بڕیارە ستەمکارانەی فەرمانداری مەهاباد، باری گوزەرانی کرێکاران و ژنانی قورستر دەکات و پشتگوێخستنی داواکارییەکانیان لە کاتێکدایە کە هەڵاوسان و گرانی تەنگی پێهەڵچنیوە و لە هەمووکات زیاتر پێویستیان بە پشتیوانیی دارایی هەیە.
