هەموو جارێ کە ڕووداوێکی ناخۆش بەربینگ بە تێکۆشەر‌و پێشمەرگەی لایەنێکی ڕۆژهەڵاتی دەگرێ، شەپۆلێک لە هاوخەمی‌و هاوپێوەندیی ئەندامان‌و لایەنگرانی لایەنەکانی دیکە لە گەڵ خاوەن خەم‌و خاوەن کۆستەکە وەڕێ دەکەوێ. بەڵام زۆری پێ ناچێ‌و ئەم کەشوهەوا باشە جێگای خۆی دەداتەوە بە دەمبەدەمە‌و پێکدادانی تانە‌و تەشەر‌و قسەی ناخۆش. هەر سووکە بیانوویەک بەسە بۆ ئەوەی جەماعەتێک لەم لا‌و لەو لا بچنەوە نێو هەواکەی خۆیان‌و ژینگەکە نەک هەر لە خۆیان، بەڵکوو لە هەموان ناخۆش بکەن. جاری واشە «گەورە» بە ئەنقەست هەراوهوریایەک لە دژی لایەنێکی دیکە وەڕێ دەخا‌و وەک دەڵێن «ئاوەکە دەڕێژێ‌و چووکە پێی تێ دەنێ.» ڕاستییەکەی ئەوەیە هێزە سیاسییەکانی ڕۆژهەڵات، لە دۆخێکی ناڕوون‌و زۆر ناخۆش دان. زۆر لە تێکۆشەرانیان خەریکن زۆربەی تەمەنی خۆیان لە دوورە وڵاتی‌و دوورخراوەیی‌دا تێپەڕ دەکەن‌و، لە ساڵانی کۆتایی تەمەنیان نزیک دەبنەوە. چوونەوەشیان بۆ نێو خەڵک‌و وڵاتی خۆیان، تێچووی قورسی وەک شەهید بوونی هەمزە سارتکەییەکان‌و کەمال خزرییەکانی دەوێ. ڕزگار بوون لە مەرگی سیاسی‌و خەباتگێڕانەی بەرەبەرەی دوورە وڵات‌و، ژیانەوە‌و بەردەوامیی بزووتنەوەی نەتەوەیی‌و ئازادیخوازی لە ڕۆژهەڵاتی کوردستان، لە گرەوی چالاکبوونەوەی هێز‌‌و لایەنە سیاسییەکان لە نێوخۆی ڕۆژهەڵات دایە. ئەمەش یانی بە گژداچوونەوەی لەشکری هار‌و دڕندەی ڕێژیمێکی تاوانکار. ئەگەر ئەم حیزب‌و ڕێکخراوانە، وەک هێز‌و لایەنی سیاسی، هاوپەیمان‌و هاوکار نەبن، ئەگەر ڕێبەران‌و تێکۆشەران‌و ئەندامان‌و لایەنگرانیان، دۆست‌و هاوڕێ‌و پشت‌و پەنای یەکتر نەبن، چۆن دەتوانن بچینە مەیدانی ئەو شەڕە نابەرامبەرە؟! هاوڕێی هاوحیزبم!‌و هاوڕێی هاوئامانج‌و هاوخەباتم لە حدکا‌و کۆمەڵە‌و هتد! با لەم قۆناغە دەرچین کە هەموو وزەی خۆمان بۆ ململانێ لە گەڵ یەکتر لە سەر ئەم یا ئەو بەرژەوەندی دەمارگرژانەی حیزبی‌و جیناحی‌و ناوچەیی‌و شەخسی‌و هتد تەرخان کردبوو. با وزە‌و توانا شەخسی‌و حیزبییەکانمان کۆ بکەینەوە سەر یەک‌و بۆ خەبات لە گەڵ دوژمنی سەرەکیی هاوبەش‌و ڕزگاربوون لەم دوورخراوەیی‌و پەراوێزنشینییەی ئۆپۆزیسیۆنی کوردی ڕۆژهەڵات تەرخان بکەین. با خوێنی نوێترین شەهیدەکانمان لە ناوچەی شنۆ‌و خوینی ئەو شەهیدانەی ئێمە‌و هێزە سیاسییەکانی دیکە، ساڵانی ڕابردوو لە ناوچەکانی سەقز‌و دیواندەرە‌و مەریوان‌و رەبەت‌و هتد لە پێناوی شڵەقاندنی گۆمی مەندی ڕۆژهەڵاتی کوردستان‌دا، پێشکەشمان کردن، نەکەین بە دەسمایەی پێکفرۆشتنەوەی کوردایەتی‌و شۆڕشگێڕی لە دەمبەدەمەی بێنرخی نێو تۆڕە کۆمەڵایەتییەکان‌دا. با ئەو گیانانە‌و ئەو خوێنانە‌ی لەم ڕێگایە دا لێمان ئەستیندران، بکەین بە زللەی ڕاچڵەکان لە خەوی غەفڵەت، بکەین بە هەوێنی وەخۆهاتنەوە‌و بە خۆداچوونەوە، بە هەوێنی پێکهێنانی تەبایی‌و وێکهەڵکردن‌و هاوخەباتی‌و هاوپەیمانەتییەکی بەردەوام‌و درێژخایەن. لای ئێمە دیموکراتەکان، ئەم دروشمە بووە بە ئاوێزەی گوێمان‌و ڕێنوێنی ژیانی خەباتگێڕیمان کە «باشترین پاداش بۆ شەهیدەکان درێژە دانی ڕیگایانە.» بە ڕاستییش دروشمێکی جوان‌و دروستە. بەڵام با لە بیرمان بێت درێژەدانی ڕێگا‌و پڕ کردنەوەی جێگەی شەهیدانێک کە دەیان ساڵ پێشمەرگایەتی‌و تێکۆشان لە هەلومەرجی جۆراوجۆر‌دا کردبوونی بە سەرمایەیەکی مەعنەویی خەبات‌و تێکۆشانی شۆڕشگێرانە‌و ئازادیخوازی، ئەوەندە سانا نیە. ئەگەر پرژوبڵاوی‌و کەلێنەکانی نێو بزووتنەوە کەم نەکەینەوە، گرژییەکان نەڕەوێنینەوە‌و هەروا بەرامبەر یەکتر دوورە پەرێز بین، پاداشی ئەم شەهیدانەشمان پێ نادرێ‌و ڕێگای ئەوانمان پێ نابڕێ. با وەرزی سەهۆڵبەندان بە جێ بێڵین‌و بە دوور لە دروشم، بە کردەوە، بەرەو بەهاری ژیانەوە‌و هەستانەوە بچین. ڕۆژهەڵات چیتر بڕ ناکا ئەگەر وا نەکەین. قادر وریا ١٨/٠٦/٢٠١٦ (٢٩ی جۆزەردانی١٣٩٥ ) لە ژماره‌ ٦٨٢ ی رۆژنامه‌ی “کوردستان”دا بڵاو بۆته‌وه‌