چەند رۆژ بەر لە ئێستا، چوارەمین پلینۆمی کۆمیتەی ناوەندیی هەڵبژێراوی کۆنگرەی شازدەیەمی حیزبی دیموکراتی کوردستان بەرێوە چوو.
لەو پلینۆمەدا کۆمەڵیک بابەتی سیاسی و ئەرک و پێداویستیە سەرەکەیەکانی ئەم سەردەمەی خەباتی حیزب و گەلەکەمان تیشکیان خرایە سەر و ئاڵوگۆری بیروڕایان لە سەر کرا. بێ گومان باسەکانی پلینۆم فرە رەهەند بوون و بارودۆخی جیهان و ناوچە و بە تایبەتیش ئێران و رۆژهەڵاتی کوردستانیان لە خۆ گرتووە.
یەکێک لەو بابەتانەی کە لە پلینۆمدا دیسان باسی لە سەر کراوە و، وەک سەرنجێکێش خراوەتە بەر نەزەری دەفتەری سیاسی حیزب، تا لەم قۆناغەی خەباتی نەتەوایەتیماندا زیاتر سەرنجی بدرێتێ و کاری پی بکرێ، سیاسەتی رۆژهەڵات تەوەرانەی حیزبی دیموکرات و بزوتنه‌وه‌ی نه‌ته‌وه‌یی رۆژهه‌ڵاتی کوردستانه
. ئەم چەمکە چەند ساڵ بەر لە ئێستا و لە نێوان کۆنگرەکانی ١٥ و ١٦ حیزبدا، بە پێی زەرورەتی خەباتی ئەم سەردەمەمان، بوو بە یەکێک لە دروشمەکانی خەباتمان. لێرەدا مەبەستمانە، برێک زیاتر ئەم دروشمە شەن و کەو بکەین، تا زیاتر و رونتر مەبەستەکانی پشت ئەم دروشمە بەرجەستە بن.
با بە چەند پرسیار سەبارەت بە رۆژهەلات تەوەری دەست پێ بکەین.
-ئایا ئەم دروشمە بەو مانایە کە حیزبی ئێمە رۆژهەڵاتی کوردستان بە ناوەندی هەموو کوردستانی گەورە دەبینێ و پێی وایە رێگە چارەکان دەبێ لەوێوە دەست پێ بکەن؟
-ئایا ئەم دروشمە حیزبی دێموکراتی کوردستان لە بیری رزگاریی نەتەوەیی دوور دەخاتەوە؟
- ئایا رۆژهەڵات تەوەری بەرەو بیری ئێرانچیەتیمان دەبات؟
-ئایا پێداگیری لە سەر سیاسەتی رۆژهەڵات تەوەری، دەبێتە لەمپەر لە سەر رێگای هاوکاری حیزبی دێموکراتی کوردستان لە لایەک و حیزب و رێکخراوەکانی پارچەکانی دیکەی کوردستان لە لایەکی دیکەوە؟
ئەمانە و زۆر پرسیاری دیکە هەن کە دەکرێ ئەو کەسانەی بە باشێ لە سیاسەتی حیزب حاڵی نین، یا کەسانێکیش بە مەبەستی تایبەت، لە پەراوێزی دروشمی رۆژهەڵات تەوەریدا، رووبەرووی حیزبی دێموکراتی کوردستانیان بکەنەوە. بەڵام بڵیی ئەو کەسانە نەزانن کە هەر لە سەرەتاوە و نزیک ٧٠ ساڵ بەر لە ئێستا حیزبی دێموکرات، بە وەبەر چاو گرتنی ئەم راستیە کە هەر پارچەیە لە کوردستان تایبەتمەندی خۆی هەیە و بە پێی ئەو تایبەتمەندیەش شیوە خەباتی رزگاریخوازانەی تایبەت بە خۆی دەبێ، خەباتی نەتەوایەتی خۆی لە رۆژهەڵاتی کوردستان دەست پێ کرد. هەر لەو کاتەشەوە حیزب لە سەر ئەو بروایە بووە کە کێشەی نەتەوەیی خەڵکی کوردستان، کێشەی نەتەوەیەکە کە خاک و نیشتیمانەکەی لێ زەوت کراوە و بە سەر چوار دەوڵەتی ناوچەکەدا دابەش کراوە، بۆیە لە هەموو قۆناغەکانی خەباتدا، وێرای خۆ پاراستن لە دەست تێوەردان لە کار و باری بزوتنەوەی نەتەوایەتی پارچەکانی دیکە، هاوکاری و هاوپێوەندی لە گەڵ حیزب و رێکخراوەکانی بەشەکانی دیکەی کوردستانی بە گوێرەی دەرفەت و ئیمکان بە ئەرکی سەرشانی خۆی زانیوە. ئەمەش بەشێک بووە لە پرنسیپی سیاسەتی نەگۆری حیزب.
بەڵام با بزانین بۆچی حیزب لەم پلنۆمەدا بۆ جارێکی دیکە ئەم باسەی هێناوەتەوە گۆڕێ.
ئێستا ناوچەی رۆژهەڵاتی ناوەراست بە گشتی و ئەو دەوڵەتانەی کە کوردستانیان بە سەردا دابەش کراوە بە تایبەتی، بە هەل و مەرجێکی دژوارو پر لە ئاڵۆزی و ئاڵوگۆڕدا تێدەپەرن. بە تایبەت هەواڵەکانی پێوەندیدار بە عێراق و سوریە لە لایەک و هەواڵەکانی پێوەندیدار بە باشوور و رۆژئاوای کوردستان لە لایەکی دیکەوە سەرنجی هەموو مێدیا و راگەیەنە گشتیەکانی جیهانیان بۆ لای خۆیان راکێشاوە. هەر لەم پێوەندیەشدا نەقش و رۆڵی کۆماری ئیسلامی هەم لە عێراق و هەم لە سوریە بە شێوەی جۆراو جۆر، نەک هەر مەترەحە، بەڵکوو لە هێندێک حاڵەتدا خۆی وەک دۆست و پشتیوانی هێندێک لە حیزب و رێکخراوەکانی ئەو بەشانەی کوردستان پێشان دەدات. ئەمەش لە حاڵێک دایە کە لە رۆژهەڵاتی کوردستان، زیاتر لە ١٠ ملیۆن کەس، لە لایان کۆماری ئیسلامیەوە نەک هەر لە هەموو مافە نەتەوەیەکانی خۆیان بێ بەش کراون، بەڵکو هەر جۆرە داوا و داخوازیەکی تەنانەت سەرەتایی ژیانیش، بە گرتن و ئەشکەنجە و ئیعدام وەڵام دەدرێتەوە. لە هەمانکاتدا ئەو رێژیمە دەیهەوێ لەو فەزایەی ناوچەکە کەڵک وەر بگرێ و لە لایەک سەرپۆش لە سەر کێشەکانی نێو خۆی ئێران دابنێ و لە لایەکی دیکەشەوە نەهێڵی کە دەنگی مافخوازانەی خەڵکی رۆژهەلاتی کوردستان بگاتە بیر و رای گشتی جیهان.
بە وەبەر چاو گرتنی سەرجەم ئەم راستیانەیە کە حیزبی دێموکراتی کوردستان لە ژێر دروشمی رۆژهەڵات تەوەریدا، هەوڵ دەدات کە نەهێڵی بە هیچ جۆرێک دەنگی مافخوازانەی خەڵکی رۆژهەڵاتی کوردستان کپ بکرێ. ئەمەش هەروەک لە راگەیەندراوی کۆتایی پلینۆمدا هاتووە پێویستی بە خەباتێکی هەمەچەشن و فرە رەهه‌ند هەیە. ئەم خەباتە فرە رەهەندە پێویستە لە خەباتی مەدەنی و جەماوەری، خەباتی دونیای مەجازی، خەباتی دیپلۆماسی و نێونەتەوەیی و، لە کاتی پێویستدا لە خەباتی چەکداریشدا رەنگ بداتەوە. پێویستە سەرجەم پوتانسیەلی تێکۆشەرانی حیزب و رێکخراوەکانی رۆژهەڵاتی کوردستان، چ لە ناو خۆی کوردستان و چ لە دەرەوەی وڵات، لە راستای زیاتر وەگەڕ خستنی خەباتی نەتەوایەتی لە رۆژهەلاتی کوردستان تەرخان بکرێ.
چوونکە غافڵ بوون لە سیاسەتی رۆژهەڵات تەوەری، نەک هەر زەرەری قەرەبوو نە کراوەی بۆ بزووتنەوەی رۆژهەڵاتی کوردستان بە دواوە دەبێ، بەڵکو بە شێوەی گشتی بزوتنەوەی نەتەوایەتی خەڵکی کوردستان تێیدا زەرەرمەند دەبێ. چوونکە بە هێز بوون و مەترەح بوونی زیاتری خەباتی نەتەوایەتی لەم بەشەی کوردستان، ئەو ناهاوسەنگیەش کە ئێستا لە نێو ریزەکانی بزووتنەوەی کوردستاندا هەیە، راست دەکاتەوە. لە هەمان کاتدا مەیدانی دەست تێوەردانی کۆماری ئیسلامیش لە کار و باری حیزب و رێکخراوەکانی پارچەکانی دیکەی کوردستان بەرتەسک دەکاتەوە.
