ئەندامانی یەکیەتیی ژنانی دێموکراتی کوردستان لە نۆدشەی سەر بە شاری پاوە، بە بۆنەی هاتنی ۲٦ی سەرماوەز رۆژی پێشمەرگەی و ئاڵای کوردستان، چالاکیی تەبلیغیان بەرێوەبرد.
ژنانی کورد هەر لە سەردەمی دامەزرانی کۆماری کوردستانەوە تا ئێستاش لە جوولانەوەی رزگاری خوازی گەڵی کورددا نەخش و دەوریان بووە و جێی پەنجەیان دیار و بەرچاو بووە و لە هەموو قۆناغەکانی ئەو خەباتە چ راستەوخۆ وەک پێشمەرگە و چ وەک هێزی پشتیوان لە ناو ریزەکانی حیزبی دیموکراتی کوردستاندا خەباتیان کردووە و قوربانیان داوە.
لە بەرەبەری رۆژی نەتەوەیی ٢٦ی سەرماوەز ئەندامان و لایەنگرانی حیزبی دێموکراتی کوردستان و یەکیەتیی ژنانی دێموکرات، بە بڵاو کردنەوەی تراکت و وێنەی پێوەندی‌دار بە پیشمەرگە و خەباتکارانی دێموکرات، لەگەڵ ڕێباز و ئامانجەکانی حیزب و سەرجەم ژنانی شەهیدی نێو سەنگەر پەیمانی وەفادارییان نوێ کردەوە.
شیاوی باسە لەو چالاکییە‌دا بۆ جارێکی دیکە وێنە شەهیدان "سوهەیلا قادری "و" مامۆستا نەسرین" دوو ژنە تێکۆشەر و پێشمەرگەی حیزبی دێموکراتی کوردستان کە لە کاتی مووشەکبارانی قەڵادا شەهید کران، وەکوو هێمای ژنان و کچانی تێکۆشەری کورد بەرز کرانەوە.
یەکیەتیی ژنانی دێموکراتی کوردستان سپاس و پێزانینی خۆی پێشکەش بە سەرجەم لایەنگرانی خۆی لە نێوخۆی وڵات دەکا و سڵاو بۆ ژنان و تێکۆشەرانی شار نۆدشە دەنێرێ.
