بەبۆنەی هاتنەوەی جێژنی خاونکار پر بەدڵ پیرۆزبایی لە هاونیشتمانیان، بەتایبەت پەیڕەوانی ئایینی یاری لە کوردستان دەکەم. پەیڕەوانی ئایینی یاری لە ئێران لە سایەی دەسەڵاتی کۆماری ئیسلامییەوە بەردوام لەژێر فشار و چەوسانەوەی چەند قاتدا بوون. ئەم ڕێژیمە هاوتەریب لەگەڵ سەرکوتی مافی و ئازادییەکانی گەلانی ئێران بەگشتی، خاوەن‌باوەڕانی ئایینیی یاریی بەتایبەت لە کوردستان پتر خستووەتە بەر ئازار و هەوڵی سڕینەوەیان، یان گۆڕینی شوناسی یارسانەکان دەدا، چونکی یارسانەکان خاوەن ئایین ‌و رێوشوێنیکن کە لەگەڵ بنەما ئایدیولۆژییەکانی دەسەڵاتدارانی کۆماری ئیسلامی ناتەبایە‌. بەم هۆیە و زۆر هۆکاری دیکەش، لە بەشداریی سیاسی و ئیداریی وڵات و بەڕێوەبەری لە دامودەزگاکانی دەوڵەتی دوور دەخرێنەوە و سووکایەتی بە بیر و باوەڕەکانیان دەکرێ. بەڵام کوردانی یاری کە هەڵگری کۆمەڵێک تایبەتمەندی و بایەخی میژوویی ‌و نەتەوەیی گەلی کوردن، هەرگیز پێملی ویست و ئیرادەی کۆماری ئیسلامی نەبوون و شانبەشانی خوشک و برا کوردەکانی دیکەیان لەپێناو مافی نەتەوایەتی و دەستەبەری ئازادییە ئایینییەکانیان تێکۆشاون. بێگومان یەکڕیزیی گەلی کورد لە ڕۆژهەڵاتی کوردستان بە هەمو پێکهاتە و ئایین ئایینزاکانیه‌وە، بە یارسان و شیعە و سوننەوە پێداویستێکی گرینکی خەباتی نەتەوایەتیی ئیمەی کوردە لە پێناو دەستەبەرکردنی ماف و ئازادییەکانمان؛ بۆیەش دەبێ بە یەکگرتوویی زیاترەوە لەو سەنگەرەدا شانبەشانی یەکتر تێبکۆشین. جارێکی دیکەش لەلایەن خۆم و بە نوێنەرایەتیی هاوسەنگەرانیشم لە حیزبی دێموکراتی کوردستان پیرۆزبایی جێژنی خاوەنکارتان لێ دەکەم و ئاواتی باشی و سڵامەتی بۆ هەموو لایەک دەخوازم. خالید عەزیزی سکرتێری گشتیی حیزبی دێموکراتی کوردستان ٢٧ی خەزەڵوەری ١٤٠٠