هەروەک لە هەواڵەکاندا هاتبوو، ڕۆژی ٥ی ڕێبەندان بەداخەوە شاعیری بەناوبانگی کورد "عەلی ئەشرەف نەوبەتی" ناسراو بە پەرتەوی کرماشانی ماڵاوایی لە ژیان و لە وێژەی کوردی کرد.
مامۆستا پەرتەو یەکێک لە شاعیرە ناودارەکانی کوردستان بوو کە شێعر و هۆنراوەکانی وێردی سەر زمانی خەڵک بە تایبەت خەڵکی خوارووی ڕۆژهەڵاتی کوردستان بوون. پەرتەو هۆگرییەکی تایبەتی بە خاک و گەلەکەیەوە هەبوو، هەر بۆیە شێعرەکانی ئاوێتەی خۆشەویستیی نیشتمان بوون. ئەو هیچ کات لە بەرانبەر زوڵم و زۆریی دوو ڕێژیمی پاشایەتی و کۆماری ئیسلامیدا بێدەنگ نەبوو و بە هەڵوێست و جوامێری و شێعرەکانی خزمەتێکی گەورەی بە زمان و ئەدەبیاتی گەلەکەی کرد.
مامۆستا پەرتەو زیاتر لە سێ هەزار بەیت و هۆنراوەی پێسکەشی کتێبخانەی کوردی کرد و هەوڵی دا بە زمانی پاراوی کوردی هۆنراوەکانی بهۆنێتەوە و لە وشە و دەستەواژەی بێگانە خۆی بە دوور بگرێ.
بە کۆچی مامۆستا عەلی ئەشرەف نەوبەتی گەلی کورد یەکێک لە شاعیرە ناودارەکانی لەدەست دا، بەڵام خزمەتی مامۆستا پەرتەو بە زمان و ئەدەبیاتی بەرگریی گەلەکەی و شێعرە پڕ لە هەستەکانی بۆ هەتاهەتایە لەنێو دڵ و یادەوەرییەکانی خەڵکی کوردستان و مێژووی کورد و کتێبخانەی شێعر و ئەدەبیاتدا کوردی‌دا دەمێننەوە و شاعیران و ئەدەبدۆستانی کوردستان و خەڵکی کورد بە گشتی بە ڕێزەوە سەیری خزمەت و ماندووبوون و گەورەیی ئەو شاعیرە نەمرە دەکەنەوە.
حیزبی دێموکراتی کوردستان وێڕای بەداخبوون لە مەرگی شاعیری بەناوبانگی گەلەکەمان مامۆستا عەلی ئەشرەف نەوبەتی ناسراو بە پەرتەوی کرماشانی، سەرەخۆشیی خۆی پێشکەشی بنەماڵەکەی و ئەدەبدۆستان و خەڵکی کرماشان دەکا و خۆی بە شەریکی خەمیان دەزانێ.
حیزبی دێموکراتی کوردستان
سکرتاریا
٥ی ڕێبەندانی ١٤٠٠ی هەتاوی
