وەزارەتی خەزێنەداریی ئامریکا ڕۆژی پێنجشەممە ١٣ی خەرمانان، ٣ کەس و ١١ شیرکەتی ئێرانی، ئیماراتی و چینی بەهۆی پێشێلکردنی گەمارۆکان و ئاسانکاری بۆ فرۆشتن و گواستنەوەی بەرهەمەکانی پێترۆشیمیی ئێران، تەحریم کرد.
لە بەیانییەی ئەم وەزارەتخانەیەدا هاتووە، ''عەلیڕەزا ئەمین'' شارۆمەندی ئێرانی و ''لین ژیو و شی مین'' خەڵکی چین، خراونەتە نێو لیستی گەمارۆکانی ئامریکاوە.
شیرکەتەکانی پێترۆشیمیی ''زاگرۆس''، پاڵاوتگەی نەوتی ئابادان لە ئێران، شیرکەتەکانی ''تریو ئێنرژی و پێترۆتک'' لە ئیماراتی یەکگرتووی عەرەبی و شیرکەتی ''فەناوەریی ژینگۆ'' لە چین و هەروەها شیرکەتە چینییەکانی ''دیناپێکس ئێنێرژی و دینرین'' لە هۆنگ کۆنگ لەو شیرکەتانەن کە خراونەتە نێو لیستی گەمارۆکانەوە.
''ستوێن منوچین'' وەزیری خەزێنەداریی ئامریکا لەو بەیانییەیەدا وتوویەتی ڕێژیمی ئێران پارەی فرۆشی بەرهەمە پێترۆشیمییەکان لە تێرۆریزم و هەوڵە تێکدەرانەکانی خەرج دەکات.
هەروەها ''مایک پۆمپێئۆ'' وەزیری دەرەوەی ئامریکا لەمبارەوە وتوویەتی کە فرۆشی بەرهەمە پێترۆشیمییەکان سەرچاوەیەکی گرینگی داهاتی ڕێژیمی ئێرانە و ئەم داهاتانە یارمەتی بە ڕێژیمی ئێران دەدات کە پشتیوانی لە ڕێژیمە گەندڵەکان و گرووپە تێرۆریستییەکان لە ڕۆژهەڵاتی ناوەڕاست بکات.
هەر لەو پێوەندییەدا پێشتریش ''پۆمپێئۆ'' ڕایگەیاندبوو کە ئامریکا لە ڕێکەوتی ٢٠ی سێپتامبر، گەمارۆوە نێونەتەوەییەکان دژی ڕێژیمی ئێران وەگەڕ دەخاتەوە.
