کوردستان میدیا

ماڵپەڕی ناوەندیی حیزبی دێموکراتی کوردستانی ئێران

ئامریکا: ئێمە لەسەر پشتیوانیکردنی هێزی پێشمەرگە پێداگرین

18:22 - 7 سەرماوەز 2721

کۆنسولخانەی ئامریکا لە هەولێر، لە پەیامێکدا هێرشی داعش بۆ سەر هێزەکانی پێشمەرگەی ئیدانە کرد و ڕایگەیاند: "ئێمە لەسەر پشتیوانیکردنی هێزی پێشمەرگە و شکستدانی داعش، پێداگرین".

لەو پەیامەدا هاتووە: "بە توندی هێرشی تێرۆریستی و ترسنۆکانەی داعش ئیدانە دەکەین. ئەوپەڕی سەرەخۆشی و هاوسۆزیی خۆمان ئاراستەی بنەماڵەی ئەو پێشمەرگە ئازایانە دەکەین کە لەو هێرشەدا گیانیان سپارد و بریندار بوون".

شەوی پێش تێرۆریستانی داعش لە ناوچەی تەپی تەڵان لە سنووری کوڵەجۆ هێرشیان کردە سەر هێزەکانی پێشمەرگەی هەرێمی کوردستان و لە کاتی بەهاناوەچوونی پێشمەرگەکانیش، بۆمبێکی چێندراو بە ماشینێکی پێشمەرگەکاندا تەقییەوە و بەهۆیەوە پێنج پێشمەرگە شەهید بوون و چواری دیکەش بریندار بوون.