جارێکی دیکە ژینگەی دەوروبەری گۆلی زریبار لەلایەن نەیارانی ژینگەوە ئاگری تێبەردرا و ڕووبەرێکی بەرچاو لەو ژینگەیە لە ئاگردا سووتا.
هاوکات لەگەڵ گەڕانەوەی باڵندە کۆچەرییەکان بۆ گۆلی زرێبار، ژینگەپارێزانی "ئەنجومەنی سەوزی چیا" ڕۆژی پێنجشەممە ١٠ی ڕەزبەر، دەستیان کرد بە خاوێنکردنەوەی ژینگەی ئەو گۆلە و ئامادەکردنی بۆ باڵندەکان.
تەنیا ڕۆژێک پاش ئەو هەوڵە ژینگەپارێزییە، نەیارانی ژینگە قامیشەڵان و گژ و گیای دەوروبەری ئەو گۆلەیان ئاگر تێبەردا. ئەو هەوڵەی نەیارانی ژینگە کاریگەرییەکی زۆر زیانباری لەسەر ئیکۆسیستەمی ئەو گۆلە و دەوروبەری دەبێت.
لە حاڵێکدا کە ژینگەپارێزان بە شێوەی بەردەوام هەوڵی نۆژەنکردنەوەی ئەو گۆلە دەدەن و پێش بە لەنێوچوونی ئێکۆسیستەمی دەگرن، لە بەرانبەردا ڕێژیم بە هەوڵە سیستەماتیک و بەرنامە دژە ژینگەییەکانی هەوڵ بۆ لەنێوبردنی ئەو ژینگەیە دەدات.
زرێبار دەکەوێتە ٥ کیلۆمەتریی شاری مەریوان لە پاریزگای سنە و گەورەترین گۆلی ئاوی شیرین لە کوردستان و ناوچەکەیە.
