کوردستان میدیا: ئامریکا لێخۆشبوون لە بواری کڕینی نەوتی ئێران نوێ ناکاتەوە و هەر وڵاتێکیش نەوتی ئێران بکڕێت، سزا دەدرێت.
برایان هووک، نوێنەری تایبەتی ئامریکا بۆ کاروباری ڕیژیمی ئێران، ڕۆژی هەینی ١٠ی جۆزەردان، لە بارەی لێخۆشبوونی هەندێک لە هاوردەکەرانی نەوتی ئێران ڕایگەیاند: "ئەگەر هەر وڵاتێک هەتا ڕادەی دیاریکراوی ئامریکا نەوتی لە ئێران هاوردە نەکردبێت، ئەوا لەگەڵ گەمارۆوەکانی ئامریکا ڕووبەڕوو دەبێتەوە".
نوێنەری تایبەتی ئامریکا بۆ کاروباری ڕێژیمی ئێران، لە بەشێكی قسەکانیدا ڕایگەیاندبوو: کە سیاسەتەکانی ئامریکا ڕوونە و ئەویش بە سفرگەیاندنی کڕینی نەوتی ڕێژیمی ئێرانە.
قسەکانی برایان هووک لە کاتێکدایە، کە ڕۆژنامەی وال ستریت ژۆرناڵ ڕایگەیاندبوو، لەوانەیە ئامریکا ئیزن بە هەندێک لە وڵاتەکان وەک: هیند و چین بدات کە درێژە بە کڕینی نەوتی ڕێژیمی ئێران بدات، بەڵام برایان هووک ئەم هەواڵەی ڕەت کردەوە و وتوویەتی: کە لێخۆشبوون لە وڵاتەکان کۆتایی هاتووە.
ئامریکا لە نوامبری ساڵی ڕابردوودا، کە خولی دووهەمی گەمارۆوەکان دەستی پێ کرد، لێخۆشبوونێکی شەش مانگەی بۆ هەشت کڕیاری سەرەکیی نەوت و گازی ئێران واتە: چین، هیندوستان، کورەی باشوور، ژاپۆن، تورکیه، تایوان، ئیتالیا و یوونانی دیاری کرد.
