لە سنەی قارەمان، کچان و کوڕانی شۆڕشگێڕ، بەبۆنەی ٢ی ڕێبەندان، ساڵڕۆژی دامەزرانی کۆماری کوردستانەوە شیرینییان بڵاو کردەوە.
بەبۆنەی ٧٤ـەمین ساڵڕۆژی دامەزرانی کۆماری کوردستان، كچان و كوڕان پێشمەرگەئاسا له مەيدانى "ئيقباڵـ"ـی سنه، وێنەی پێشەوا و ئاڵای کوردستانیان بڵاو کردەوە.
هەروەها ڕۆڵەکانی گیانلەسەردەست شیرینییان لەنێو خەڵکدا بڵاو کردەوە.
ئەو کارەی ڕۆڵەکانی سنەی خوێناوی لەگەڵ پێشوازیی گەرمی خەڵک بەرەڕوو بووەوە و خەڵک بە چەپڵەلێدان پێشوازییان لێکردن.
ئەو چالاکییە بەبۆنەی ٢ی ڕێبەندان و لە حاڵێکدا ئەنجام دراوە کە هێزە نیزامی و ئەمنییەتییەکانی ڕێژیمی ئێران لە شەقام و مەیدانی ئیقباڵ جێگیر کرابوون.
مەیدانی ئیقباڵ لە سنە جیا لەوەیکە بە هێزی نیزامی تەنراوە، بە کامێرای چاوەدێریش کۆنترۆڵ دەکرێت.
هێزە نیزامییەکانی ڕێژیمی ئێران لە سنه مۆبایلی هاووڵاتییان دەپشکنن و ئیزن نادەن هیچ کەس وێنه یان فیلم بگرێت.
ئەندامان و لایەنگرانی حیزبی دێموکرات، بەبۆنەی ٢ی ڕێبەندانەوە به شێوەیەکی زۆر جیاواز و بەربڵاو لە ئاستی شار و گوندەکانی کوردستان چالاکیی تەبلیغی بەڕێوە دەبەن و ئەو ڕۆژە مێژووییە پیرۆز دەکەن.
