کوردستان میدیا: کۆنگرەی نەتەوەکانی ئێرانی فێدراڵ، لە دانیشتنی ساڵانەی خۆیدا لەبارەی سنوورەکانی ئێران بڕیارنامەیەکی بڵاو کردەوە.
دەقی بڕیارنامەکە:
بە مەبەستی پاراستنی یەکیەتی و تەبایی نەتەوەکانی ئێران و خۆڕاگریی ئەو نەتەوانه کە دژی ڕێژیمی ئێران و لەپێناو ڕووخاندنی ئەو ڕێژیمە خەبات دەکەن و بۆ دامەزراندنی نیزامێکی دێموکراتیک هەوڵ دەدەن، کۆنگرەی نەتەوەکانی ئێرانی فێدراڵ جەخت لەسەر ئەوە دەکاتەوە کە چارەسەرکردنی کێشەی سنوورەکانی نێوان نەتەوەکانی ئێران لە ئەستۆی مەجلیسی نەتەوەیی/ ئەیالەتییه.
کۆنگرەی نەتەوەکانی ئێرانی فێدراڵ لەو بڕیارنامەیەدا باسی لەوە کردووە، کە باسکردن لە کێشەی سنوورەکان لە ئێستادا ئاڵۆزی دەخاتە ناو ڕیزی خەباتی سیاسیی نەتەوەکانی ئێران کە دژی ڕێژیمی ئێران خەبات دەکەن و ئەوەش بە قازانجی ڕێژیمی کۆماری ئیسلامیی ئێرانه.
ئەندامانی کۆنگرەی نەتەوەکانی ئێرانی فێدراڵ، جەخت لەسەر ئەوەش دەکەنەوە کە لە ڕێگای دیالۆگ و گفتوگۆ کێشەی خاک لە نێوان نەتەوەکانی ئێران چارەسەر دەکرێت و ئەو بەرپرسایەتییەش دەخاتە ئەوستۆی مەجلیسی نەتەوەیی ئێران.
کۆنگرەی نەتەوەکانی ئێرانی فێدراڵ
