کوردستان میدیا

ماڵپەڕی ناوەندیی حیزبی دێموکراتی کوردستانی ئێران

بۆ کۆنگرەی ١٦ی حدکا! - بەشی یەکەم

20:29 - 17 خەزەڵوەر 2716

محمد سلێمانی

کۆنگرەی ١٦ی حیزبی دێمۆکڕاتی کوردستانی ئێران دەبێت وەك پرۆسەیەکی گەورەی نەوژنکردنەوە و سەرلەنوێ بیناکردنەوەی جەوهەریانەی پێك هاتەی خۆی چ لە ئاستی رێبەری یان ئۆرگانەکانیخواروتردا سەریر بکرێ و کەش و هەوایەکی نوێی سیاسی و تەشکیلاتی لە نێو ڕێزەکانی حدکادا بخولقێندرێت. کۆنگرە وێرای هەڵسەنگاندنی مەوزوعیانەی شێوەکانی خەبات لە قۆناخی ئیستادا، ئەو هەنگاوانە توندوتۆڵبکرێن کە بەدژی ڕێژیمی ئاخوندی ئیران کاریگەریان هەیە و دەتوانێت دەوری شوێندانەری لەسەر هەلومەرجی سیاسی و کۆمەڵایەتی خەڵکی کوردستان هەبێ لە مێژووی نوێی سەرهەڵدانەوەی خەباتی سیاسی و چەکداری حیزبیدا. هێزێکی سیاسی ومۆدێرێنی وەك حدکا، بەهۆی سروشتی جوان و دێمۆکراتیکی کە هەیەتی، بەردەوام ئاوڕی لە ڕابردووی سیاسی خۆیداوەتەوە و ئەگەر لە شوێنێكدا هەڵەیەك یان کەمترخەمیەك روویدابێ و زیانی بەحیزب و جولانەوەی سیاسی گەیاندبێ، لە خۆی قبوڵنەکردوە و لە رەوتی تێکۆشانی سیاسیدا، بەرپرسانە بەخۆیدا چۆتەوە و ژینگەی خۆی ڕێکخستۆتەوە. بەدڵنیایەوە کۆمەڵانی هەرواوی خەڵکی کوردستان بە هەموو پێك هاتە وچین و توویژە کۆمەڵایەتیەکانییەوە چاوەڕوانی هەنگاوی تازە لە پێناو وەسەریەك خستنەوەی بنەماڵەی گەروەی دێمۆکرات لە حدکا دەکەن و بۆ ئەو مەبەستەش کۆنگرەی ١٦ی حیزب ئەرکێکی گرینگ و مێژووی دەکەوێتەسەرشان کە بتوانێت لەسایەی بڕیاری سیاسی و وردبینی لە سەر بنەمای بەرژەوەندی گشتی نەتەوەیدا، هەڵوێستی نوێ وەربگرێ.

جەوهەری کێشەو ناکۆکیەکان بە ئاڕاستەی تەبای و پێکەوە کارکردن لە نێو حدکایەکی گەورەو یەكگرتوو بگۆڕێت. چوونکی خەڵکی کوردستان هەر ئەوەیان لە حیزبی خۆیان چاوەڕواندەکەن و هیوای ئەو دەخوازن کە حدکا بۆ جارێکی دیکە و بە هەستی بەرپرسیارانەی چاو بە رەوتی یەکگرتنەوەی بنەماڵەی گەروەی دێمۆکڕاتدا بەگێڕێ و کاربۆلابردنی لەمپەر و کەندوکۆسپەکانی سەر ئەو رێگایە بکا کە خواستی زۆربەی خەڵك و تێکۆشەرانی دێمۆکراتە. داڕشتنەوەیی سەر لە نویێ سیاسەت وستڕاتیژی حیزب و هەرلەوکاتەشدا هەڵبژاردن و بڕیاردان سەبارەت بەجۆری سیاسەتی لێك تێگەیشتن و دانیشتن و دیالۆگ لە گەڵ موخالیفان لە سەر بنەمای بیرکردنەوەیەکی تازە و قوڵ بە مەبەستی پێک هێنانی بەرەیەکی کوردستانی بە بێ هەڵاواردنی ڕێکخراوەیی لە سەر ئەساسی پێگەیان لە نێو خەڵکی کوردستاندا، دەتوانێت کلیلی چارە سەری زۆر بەیی ئەو گرفتانە بێت کە بەردەوام لە سەر ڕێگایی یەکڕیزی خەباتی هاوبەشی کورد بووە، بۆ گەئیشتن بە ئامانجی سیاسی و نەتەوەییەکانی لە ڕۆژهەڵاتی کوردستان. حدکا لە مێژووی تێکۆشانی سیاسیدا هەرگیز لە هەڵوێست وەرگرتن و بڕیارداندا، دوو رووینەکردوە و وەك هێندێك هێزی سیاسی شوێن رووداوەکانی هەڵنەگرتووە،یان ڕێبەرەکانی خۆیان بە سەرچۆپیکێشی مەسەلە پڕلە کێشەو قەیرانە نێوخۆیەکانی هێزە سیاسیەکانی ڕۆژهەڵات نەزانیوە و بە فرسەت و هەستی نابەرپرسانە و لێكدانەوەی هەلومەرجی سیاسی و پەیوەندییەکان بڕیاری نەداوە. حیزبی دێمۆکراتی کوردستانی ئێران وەك هێزێکی میللی دێمۆکراتێك و سەربەرزی سیاسی و تەشکیلاتی ڕۆژهەڵاتی کوردستان، روڵی دیارو گاریگەری لەسەر هەلومەرجی سیاسی و کۆمەڵایەتی کوردستان هەبووە و هەیە و، پێویستە لە ئێستادا وێڕای پێداچوونەوە و ڕەخنە لە لایەنە لاوازەکانی کار و خەباتی خۆی، هەوڵبدات بە بەرنامە و ستڕاتیژی نوێی خەبات و تێکۆشان، بەرەو پیری کۆنگرەی ١٦ خۆی هەنگاو بهاوێژی. پەیامی کۆمیتەی ئامادەکاری بۆ کۆنگرەی ١٦ی حیزب لە ڕاستیدا گرینگی و تایبەت مەندی سیاسی و تەشکیلاتی خۆی هەیە و حیزبی دێمۆکڕات کە خۆی بە هێزێکی خەڵکی و نەتەوەی ئەژماردەکات، بەڕەوای دەزانێت پرسە گرینگ و هەستیارەکانی بە پاڵپشتی و کۆدەنگی نەتەوەی دابنێ و هەموو چین و توێژێکی کۆمەڵایەتی نێو کۆمەڵگای کوردستان بە ڕێگای ناردنی سەرنج و پێشنیار، هەوڵبدەن سەرڕاستی ڕێچکەیەکی تازە و بەرهەمدار بۆ حیزب بەخولقێنن و ، لە داهاتووی خەباتی سیاسیدا کەڵک لە کۆی گشتی پێشنیاز و بیروڕاکان وەربگیڕی و کۆبەندی خاڵ و مەسەلەکان بکرێتە هەوێنی ئەو قۆناخە تازەیەی تێکۆشان کە حیزب وەك نوێ ترین هەنگاوی سیاسی بڕیاری لە سەر داوە و چاوەڕواندەکرێت لەسەریشی بەردەوام بێت.

ئەگەر بێت و هەلومەرجی سیاسی و نێوخۆی باشوری کوردستان بۆ ئەو مەبەستە لەبارو گونجاوبێ، کە خۆی لە چالاکیەکانی هێزی پێشمەرگەی حیزبدا دەبینێتەوە! دەست پێکردنەوەی خەباتی سیاسی و تەشکیلاتی و چەکداری لە ڕاستیدا وەك سەرەتا شۆڕشێکی بەربڵاوی سیاسی و نەتەوەی سەیردەکرێ و حکوومەتی ئاخوندی ئێران ئەگەر لە ژێر فشاری نێوخۆیدا نەبێت، هەرگیز بە ڕێگای ئاشتی و لێك تێگەیشتندا مافی سیاسی و نەتەوەی گەلی کورد و گەلانیتری وڵات ناسەلمێنێت.

حیزبی دێمۆکڕات وێرای پشتیوانیکردن و ڕێکخستنی ڕێکخراوە مەدەنیەکان، تێ بکۆشێت لە هێز و ئەنەرژیان لە کات و شوێن گونجاودا کەڵكی شیاو وەربگرێ و هەرلەوکاتەیشدا وەك سەرمایەکی مرۆڤی و مەعنەوەی بیان پارێزێت. ئەوەش بەڕێگای دیاریکردنی بەرنامە و ستڕاتیژی کرداری شیاو دەسکەوتی دەبێت. حدکا لە هەنگاوەکانیدا کە دەیهاوێژێت بەدڵنیایەوە بەرپرسیارەتی نەتەوەی لەسەرشانە و کۆمەڵانی هەراوی خەڵکی کوردستان ئومێدیان لەسەر بەهێزبوون و شێوەی بەرخۆدانی حیزبی دێمۆکڕاتی کوردستانی ئێران هەڵچنیوە و لە هەموو کات و شەرایەتێكدا ئامادەن پشتیوانی لێبکەن. بەڵام زۆر گرینگە کە حیزب لە داهاتوودا بتوانێت میتۆد و میکانیزمی سیاسی و تەشکیلاتی خۆی لە ئاستی نێوخۆ و دەرەوەدا بەجۆرێك سازوئامادە بکاتەوە، کە توانای ئەوەی هەبێت روبەرووی ئەگەری رووداوی لەناکاوی سیاسی وڵات بێتەوە. لە رەوتی تێکۆشانی سیاسیدا دەکرێت تاکتیکی خەبات فیدای دروشمی ستڕاتیژی بکرێ و هەرگیز ناکرێت پێچەوانەکەی ئەنجامبدرێ. پاشان قۆناخی ئێستای خەبات نیازی بە هێزێکی تێکۆشەری سیاسی و تەشکیلاتی و چەکداری هەیە و بۆ ئەو مەبەستەش کۆنگرە دەبێت کەسانێك بە شیاوی ڕێبەری حدکا بزانێت و هەڵیانبژێرێ کە توانا و ئامادەی خەباتی بەکردەوەیان تێدا بەدی بکرێ. بەواتایەکی تر ئەو ڕێبەرییە دووربێت لە مانۆڕدان و خۆدوورگرتن لە گەڕانەوە بۆ نێوخۆی وڵات و، ئەو کەسانەی بۆ ئەو پۆستە خۆیان بەربژێر دەکەن، ئەو ئامادەیەن تێدا هەبێ و خۆشیان دڵخوازی خەباتی ڕاستە و خۆ و گەڕانەوەیان هەبێت بۆ ڕۆژهەڵاتی کوردستان. دیارە لە ڕابردووشدا ئەو بابەتە خاڵێكی جەوهەریانەی نێو کۆنگرەکانی حیزب بووە و لە سەر ئەساسی هەڵسوڕان و چالاکییەکان دەنگ بەبەربژێرەکاندەدرا. لە ڕاستیدا پێویستە ئەو نەریتە شایستە و مێژوویە زیندوو بکرێتەوە، چوونکی بزووتنەوەی سیاسی و شۆڕشگێڕی لە رۆژهەڵاتی کوردستاندا، نیازی بە رێبەر و پێشڕەوی ئەو تۆ هەیە کە توانای بڕیاردان و لێكدانەوەی مەسەلە گرینگ و خەباتگێڕیەکانی بەدژی حکوومەتی ئاخوندی ئێران هەبێ و ڕاستەوخۆ پەیوەندی حیزب لەگەڵ خەڵکدا پەرەپێبداتەوە و لە رەوتی تێکۆشانی نوێدا بەرچاو روونی زیاتر بخرێتە پێش چاوی خەڵك.

درێژەی هەیە