کوردستان میدیا: بەرپرسانی باڵای ڕێژیم لە پارێزگای سیستان و بەلووچستاندا، خەریکی کاری قاچاخچییەتین.
ڕۆژی پێنجشەممە، ١٣ی پووشپەڕ، "محەممەد موحیبی"، بەرپرسی کۆمیسیۆنی ڕووبەڕووبوونەوە لەگەڵ قاچاخی کاڵا و ئەرزی ڕێژیم لە سیستان و بەلووچستان، لە پرێسکۆنفڕانسێکدا، باسی لە تێوەگلانی بەرپرسانی ڕێژیم لە کاری قاچاخی سووتەمەنیدا کرد.
ئەم بەرپرسەی ڕێژیم، لە بەشێک لە قسەکانیدا وتوویەتی: "لە ڕاستای ڕووبەڕووبوونەوە لەگەڵ قاچاخی سووتەمەنی، پێشگرتن لە سەرانی ئەم کارە بۆمان لە سەرەتیدایە و هەڵبەت تێوەگلانی هەندێک لە بەرپرسانی باڵا لە کەیسە گەورەکانی قاچاخ، حاشاهەڵنەگرە".
بە قسەی "محەممەد موحیبی"، ناوەندە پەیوەندیدارەکان لە ئێستادا خەریکی لێکۆڵینەوە لەو کەیسانەن و بەم زووانە ئەنجامەکان بڵاو دەکەنەوە.
بە چاولێکردن لە کار و هەستی بەرپرسیاریەتی و دڵسۆزیی بەرپرسانی ڕێژیم و سیاسەتەکانی ئەم دەسەڵاتە سەرکوتکەرە، تێوەگلانی بەرپرسانی ڕێژیم لە کەیسی کاری قاچاخدا شتێکی نوێ و سەرسوڕهێنەر نییە. گەندەڵی یەکێک لە سیفەتە هاوبەشەکانی بەرپرسانی ڕێژیمە، کە لە ڕاستای دابینکردنی پێویستییە کەسی و زۆرکردنی داهاتەکانیان لە ماوەی دەسەڵاتیاندا، لە دەسەڵاتەکەیان کەڵکاژۆ وەردەگرن و داهاتی خەڵکانی ئێران بەتاڵان دەبەن و هیچ کەسێکیش ناتوانێت قامکی تاوانیان بۆ درێژ بکات.
