بارینی بارانی بەخوڕ بووەتەوە هۆی ئەوەیکە ئاوی چۆم و ڕووبارەکان زیاد بکات و بەم هۆیەوە لە چەند شار و گوندی کوردستان لافاو هاتووە.
لە شارەکانی ورمێ، مەهاباد، پیرانشار، مەریوان و نەغەدە و هەروەها لە گوندەکانی "میراوای مەرگەوەڕ، فلکان و دزەی مەرگەوەڕ" لافاو هاتووە و شەقام و کۆڵانەکانی ئەو شار و گوندانە گیراوە.
لە نەغەدە شەقامەکان پڕ بووە و ئاو چووەتە نێو دووکانەکانەوە. هاوکات لە گوندەکانی مەرگەوەڕ هۆشداری بە خەڵک دراوە کە لە ڕووبارەکان نزیک نەبنەوە.
هاووڵاتییان باس لەوە دەکەن، بەهۆی ئەوەیکە ڕێگاوبان و شەقامەکان بە شێوەی ستاندارد دروست نەکراون و ڕێڕەوی ئاوەکان دیاری نەکراوە، لافاوەکان زیانی لێ کەوتووەتەوە.
لەلایەکی دیکەوە خەڵک دەڵێن، کاربەدەستانی ڕێژیم لە کاتی لافاوەکاندا هیچ هاوکارییەکی خەڵک ناکەن و خۆیان لە کاتی پرۆژەکاندا بەشێک لە کێشەکانیان دروست کردوون.
