کوردستان میدیا: بەهۆی ناکارامەیی و نابەرپرسیاریەتیی شارەوانی و شۆرای شاری مەریوان، ئەم شارە لەگەڵ چەندین قەیران و کێشەی گەورە بەرەوڕوو بووەتەوە.
بەپێی هەواڵی گەیشتوو بە ماڵپەڕی کوردستان میدیا، دۆخی نالەباری نێو شاری مەریوان و گوێنەدانی بەناو بەرپرسانی ئەم شارە، ناڕەزایەتیی خەڵکی لێکەوتووەتەوە.
سەرچاوەیەک لەنێو شاری مەریوان لەمبارەوە ڕایگەیاند: "کۆنەکردنەوەی زبڵەکان، خراپیی ئاسفاڵتی شەقام و کۆڵانەکان، شکانی لوولەی ئاوی نێو کۆڵان و پارکەکان و هەروەها ناستانداردبوونی کەلوپەلی یاریکردنی منداڵان، تەنیا چەند نموونە لە کێشەکانی شاری مەریوانن کە ژیانی خەڵکی تێکداوە".
ئەم سەرچاوەیە زیادی کرد: "کەمتەرخەمی و ناکارامەیی شارەداری و شۆرای شاری مەریوان، خەڵکی ئەم شارەی تووڕە کردووە و لە زۆر حاڵەتدا، خەڵک بۆ خۆیان کاروباری شارەداری لە شەقام و کۆڵانەکانیان ئەنجام دەدەن و چاڵەکان پڕ دەکەنەوە".
وێڕای ئەوەی چەندین کێشە و قەیران بەرۆکی شاری مەریوانی گرتووە، بەناو بەرپرسانی شارەداری و شۆرای ئەم شارە، لە تۆڕە کۆمەڵایەتییەکانی خۆیاندا سەرقاڵی دانانی بابەتگەلێکی گاڵتەجاڕانەن و بە هەندێک بابەتی چەواشەکارانە، ئەم کێشانە لە پێش چاوی خەڵک دەشارنەوە.
هەروەها، کرێکارانی شارەداریی مەریوان، لەم ساڵانەی دواییدا، هەمیشە لەگەڵ وەرگرتنی مووچە، بەرەوڕووی کێشە بوونەتەوە و جاری وایە تا شەش مانگ پارە وەرناگرن. ئەمە لە حاڵێکدایە کە بەرپرسانی سەرەوەتر، لە کاتی خۆیدا پارەی خۆیان وەردەگرن و مافی کرێکارانی شارەداری پێشێل دەکەن.
کێشە و قەیران لە شارەدارییەکانی ڕێژیم لە ڕۆژهەڵاتی کوردستاندا، ڕۆژبەڕۆژ زۆرتر دەبێت و کرێکارانی ئەم ناوەندانەش، زۆرتر لە هەمیشە مافەکانیان پێشێل دەکرێت. هەروەها کێشەگەلی جۆراوجۆر لە بەڕێوەبەریی ڕێژیم لە شارەکاندا، خەڵکی وەزاڵە هێناوە.
