کوردستان میدیا: سەرکۆماری ئامریکا، کاربەدەستان و بەرپرسانی باڵای ڕێژیمی ئێرانی بە تێرۆریستانی ژمارەی یەکی جیهان ناو برد.
ڕۆژی سێشەممە، ٣١ی بانەمەر، سەرکۆماری ئامریکا ڕایگەیاند: "لە پەیوەندی لەگەڵ ڕێژیمی ئێراندا، لە داهاتوودا دەبینین کە چی ڕوو دەدات. هەڵسوکەوتی ئەم ڕێژیمە زۆر دوژمنانە و مەترسیدارە. کاربەدەستانی باڵای ڕێژیمی ئێران، تێرۆریستانی ژمارەی یەکی جیهانن."
ترامپ، درێژەی پێ دا: "تا ئێستا هیچ نیشانەیەکمان نییە کە شتێک ڕووی دابێت. بەڵام ئەگەر ڕوو بدات، ئەم ڕێژیمە لەگەڵ هێزێکی گەورە و وێرانکەر ڕووبەڕوو دەبێتەوە و ئیتر ئێمە چارەیەکمان بۆ نامێنێتەوە."
لە ماوەی یەک مانگی ڕابردوودا، هەڕەشەکانی ئامریکا زۆرتر و توندتر بووەتەوە و بەردەوام قامکیان ڕوو لە ڕێژیمی ئێرانە.
هەروەها ڕێژیمی ئێران بە کەڵک وەرگرتن لە هێزە نیابەتییەکانی خۆی، چەند کردەوەیەکی تێرۆریستیی لە وڵاتانی ناوچەکەدا دژ بە بەرژەوەندییەکانی ئامریکا ئەنجام داوە و هەڵوێستی ئامریکا و جیهانی لێ کەوتووەتەوە.
لە ئێستادا ئامریکا جەختی کردووەتەوە کە بەپێی ١٢ مەرج، ئامادەی دانوستان لەگەڵ ڕێژیمی ئێرانە و بەپێی ئەو ١٢ مەرجە، دانوستان بۆ ئێران بە واتای خۆکوشتنە.
