تووشبووان بە نەخۆشیی کۆرۆنا ڕۆژ لە دوای ڕۆژ لە ئێران و کوردستان زیاد دەکات و کاربەدەستانی ڕێژیم نەک هەر هیچ کارێک بۆ ئەم نەخۆشانە ناکەن، لە ئاست دەرمان و پێشگرتن بە زیاتر تەشەنەسەندنی ئەم نەخۆشییە زۆریش کەمتەرخەم بوونه.
بەپێی ئەو زانیارییانەی بە ماڵپەڕی "کوردستان میدیا" گەیشتووە، لە بەشێک لە نەخۆشخانەی شاری مەریوان کە تایبەت بە تووشبووانی کۆرۆنایە، هیچ بەربەست و ڕێوشوێنێکی تەندروستیی پزیشکی بۆ ئەو کەسانەی سەردانی ئەو بەشە دەکەن نییە و خەڵک زۆر بە ئاسایی هاتوچۆ دەکەن.
بەپێی زانیارییەکان، تێست وەرگرتن بۆ نەخۆشیی کۆرۆنا لەگەڵ ئەوەیکە تێچوویەکی زۆری دەوێت لە ئێستادا بەو تێچووە زۆرەش ڕێگە نادەن کەس ئەو تێستە بگرێت، هۆکاری ئەو ڕێگرییەشیان بۆ ئەوە گەڕاندووەتەوە کە ڕێژەی تووشبووان زۆر زیادی کردووە.
هەر لەو پێوەندییەدا لە چەند ڕۆژی ڕابردوودا لە نەخۆشخانەی مەریوان تووشبوویەکی کۆرۆنا بەهۆی ئەوەی کە کەپسوولی ئۆکسیژێنی تەواو بووه گیانی لەدەست داوە.
