کوردستان میدیا: عەرەبستانی سعوودی، چوار ئەندامی تیمێکی تێرۆریستیی ڕێژیمی ئێرانی، بە ئێعدام مەحکووم کرد.
هەواڵدەرییەکانی سعوودییە بڵاویان کردووەتەوە، دادگای تایبەتی جەزایی عەرەبستانی سعوودی، ٤ ئەندامی تیمێکی تێرۆریستیی سەر بە ڕێژیمی ئیسلامیی ئێرانی بە ئێعدام مەحکووم کردووە.
ئەو ٤ کەسە تێرۆریستەی ڕێژیمی ئێران، بە تۆمەتی سیخوڕی بۆ ڕێژیم و ڕاهێنان لە پادگانەکانی سپای پاسداراندا بە ئێعدام مەحکووم کراون.
دادگای تایبەتی جەزایی سعوودییە بڵاوی کردووەتەوە، کە ئەو کەسانە بۆ چۆنیەتی بەکارهێنانی چەک و مەوادی تەقینەوە لە لایەن ڕێژیمی ئیرانەوە ڕاهێنانیان پێ کراوە.
لە درێژەی ڕاپۆرتی دادگای تایبەتی جەزایی سعوودییەدا هاتووە، ئەو ٤ کەسە ویستوویانە بە دانانی بۆمب کاری تێرۆریستی لە عەرەبستان ئەنجام بدەن.
بەرپرسانی وڵاتانی عەرەبی، بەردەوام باس لە دەسبەسەرکرانی تاقم و گرووپی سەر بە ڕێژیمی ئیسلامیی ئێران لە وڵاتانی خۆیان دەکەن.
دەستێوەردانەکانی ڕێژیمی ئێران، بەردەوام ناکۆکی و نیگەرانیی وڵاتانی ناوچەکەی لێ کەوتووەتەوە و بەردەوام هۆشداریان بەو ڕێژیمە داوە، کە دەستێوەردان لە کاروباری ئەو وڵاتانەدا نەکات، بەڵام ئەوە لە کاتێکدایە کە خامنەیی ڕێبەری ڕێژیمی ئێران ڕایگەیاندووە: "ئێمە بەردەوام پشتیوانی لە خەڵکی ئەو وڵاتانە و یەک لەوانە بەحرەین دەکەین، کە ئەوەش ناڕەزایەتیی توندی بەرپرسانی ئەو وڵاتەی لێکەوتووەتەوە".
