کوردستان میدیا: تێکدان و دەسبەسەرداگەرتنی سروشت و ژینگەی کوردستان لەلایەن کەسانی بەرژەوەندیخواز و بێدەنگیی بەرپرسانی سەرچاوە سروشتییەکان مەترسییەکی گەورەی دروست کردووە.
جیا لەوەی کە ڕێژیم هیچ بایەخێک بە ژینگە لە ئێراندا و بەتایبەت ژینگەی کوردستان نادات، کەسانی بەرژەوەندیخواز لە ناوچە جیاجیاکانی کوردستان دەستیان کردووە بە کاولکاریی ژینگە و بە تاڵانبردنی دارستانەکانی کوردستان و بۆ ناوچەکانی تری دەرەوەی کوردستانی دەگوازنەوە.
بەرژەوندیخوازان و مۆرە و بەکرێگیراوەکانی ڕێژیمی ئێران، بۆ تاڵان و کاولکاریی دارستانەکانی زاگرۆس لە مەریوان، بە بیانووی جۆراجۆر، زیاتر لە سەدان و هەزاران دۆنم لە دارستان، لەوەڕگە و لێڕەواری زاگرۆس و ژینگەی کوردستانیان کاول و وێران کردووە.
وێڕای ئاگادارکردنەوەی بیروڕای گشتی لەلایەن ڕێکخراوە ژینگەپارێزییەکان و چالاکانی ژینگەپارێزیی کوردستان، هەتا ئێستا هیچ هەنگاوێک بۆ پێشگرتن بەو کاولکارییانە لەلایەن ڕێژیمەوە هەڵنەگیراوە.
پێشتریش ئەنجومەنی سەوزی چیای مەریوان سەرەڕای دەربرینی بێزاری لە تێکدەران، بە بیانووی بازرگانی، باخ و خەڵووزسازکردن، نیگەرانیی خۆی بەتوندی ڕاگەیاندبوو و پێشتریش بە سەردانکردنی زۆربەی گوندەکان، خەڵکیان لە مەترسییەکانی لەنێوچوونی ژینگە و گرینگیی پارستنی ژینگە ئاگادار کردبووەوە.
