حیزبی دێموکراتی کوردستانی ئێران بەبۆنەی ساڵیادی دامەزرانی "پارتی کرێکاران و ڕەنجدەرانی کوردستان"، پەیامێکی پیرۆزبایی ئاراستەی ئەو حیزبە کرد و جەختی لەسەر پێویستیی بەردەوامبوون و بەهێزترکردنی دۆستایەتی و هاوکاری کردەوە.
دەقی پەیامەکە بەم چەشنەیە:
بەڕێز مەکتەبی سیاسیی "پارتی کرێکاران و ڕەنجدەرانی کوردستان"
سڵاوێکی شۆڕشگێڕانە
بەبۆنەی ١ی شوبات، بیست و شەشەمین ساڵیادی دامەزرانی حیزبە تێکۆشەرەکەتان پڕ بە دڵ پیرۆزباییتان لێ دەکەین و ئەم بۆنە پیرۆزە دەکەینە هەوێنێک بۆ وەبیرهێنانەوەی مێژووی بێگەرد و پڕ سەروەریی حیزبە نیشتمانپەروەرەکەتان و جەختکردنەوە لەسەر دۆستایەتی و پەیوەندیی دێرینمان کە تا ئێستاش وەکوو خۆمان بە نموونەی پەیوەندییەکی نیشتمانی و لەسەر بناغەی پرەنسیپە جیگەی باوەڕەکانی هەر دوو لامانی دەزانین.
ئێمە لە حیزبی دێموکراتی کوردستانی ئێراندا بە درێژایی مێژووی خەباتی پڕ هەوراز و نشێوی خۆمان هەمیشە پەیوەندییەکی دۆستانەی بەهێزمان لەگەڵ لایەنە سیاسییە تێکۆشەرەکانی باشووری نیشتمان و یەک لەوانەش حیزبی ئێوە هەبووە و هەوڵ و تێکۆشانی ڕابردووی حیزبی ئێوە لەپێناوی چارەسەریی کێشە چینایەتییەکان و پاڵپشتیی بەردەوامتان لە دۆزی ڕەوای نەتەوەیی و خەباتی لێبڕاوانەتان بۆ چەسپاندنی دێموکراسی، دادپەروەریی کۆمەڵایەتی و سەروەریی یاسا و سەقامگیریی هەرێمی کوردستان، بەرز دەنرخێنین و پێمان وایە هەڵوێست و سیاسەتەکانتان لەو پەیوەندییەدا دەکرێت وەک ئەزموونێکی بەنرخ چاوی لێ بکرێت.
لە کۆتاییدا جارێکی دیکە پیرۆزبایی گەرمی خۆمان بەبۆنەی ساڵیادی دامەزرانی "پارتی کرێکاران و ڕەنجدەرانی کوردستان" بە ئێوە و لەڕێگەی ئێوەشەوە بە هەموو ئەندامان و لایەنگرانی حیزبە تێکۆشەرەکەتان ڕادەگەیەنین و جەخت لەسەر پێویستیی بەردەوامبوون و بەهێزترکردنی دۆستایەتی و هاوکاریی نێوانمان دەکەینەوە.
پیرۆز بێت ١ی شوبات، ساڵیادی دامەزرانی "پارتی کرێکاران و ڕەنجدەرانی کوردستان"
هەر بژین و سەرکەوتوو بن.
حیزبی دێموکراتی کوردستانی ئێران
دەزگای پەیوەندییە گشتییەکان
محەممەد نەزیف قادری
