کوردستان میدیا: کۆبوونەوەی هاوبەشی ناوەندی سیاسی و دەستەی کارگێڕیی حیزبی دێموکراتی کوردستانی ئێران بەڕێوەچوو. لەو کۆبوونەوەیەدا لەسەر ئەوەی که ڕێژیمی ئێران سەرچاوەی کێشە و گرفتەکانی ناوچەکەیە، جەخت کرایەوە.
ڕۆژی چوارشەممە، ١٥ی خەزەڵوەری ١٣٩٨ی هەتاوی، کۆبوونەوەی هاوبەشی ناوەندی سیاسی و دەستەی کارگێڕیی حیزبی دێموکرات، بە چەند ساتێک بێدەنگی بۆ یادی شەهیدانی کوردستان و بەتایبەت شەهیدانی ئەم دواییانە، دەستی پێکرد.
لە سەرەتای کۆبوونەوەکەدا، لێپرسراوی گشتیی حیزبی دێموکرات، وێڕای خستنەبەرباسی دەستووری کاریی کۆبوونەوەکە، ڕاپۆرتی سیاسیی ئامادەکراو لە لایەن ناوەندی سیاسی و ڕا و سەرنجی خۆی بۆ باشتر و بەهێزترکردنی ڕاپۆرتەکەی خستە بەرباس.
ڕاپۆرتی سیاسیی ئاماژەپێکراو کە ناوەڕۆکی کۆبوونەوەی ئەمجارەی ناوەندی سیاسی و دەستەی کارگێڕی بوو، لێکدانەوە و شیکردنەوەی دۆخی ئێستای ناوچەی ڕۆژهەڵاتی نێوەڕاست و بەتایبەت دۆخی ئێران و عێراق و لوبنان بوو.
ڕۆژهەڵاتی نێوەڕاست بە دۆخێکی هەستیاردا تێدەپەڕێت و هاوسەنگیی هێز کە دوای ڕووخانی بلۆکی سۆڤیەت و بەتایبەت دوای هێرشی عێراق بۆ سەر کوەیت لە دوو دەیەی ڕابردوودا هاتبووە ئاراوە، ئێستا خەریکە لە ناوچە دەگۆڕێت و کاریگەریی خراپ و باشی لەسەر دۆخی کورد داناوە و زیاتریش دەبێت.
هەر لە کۆبوونەوەکەدا باسی دۆخی ئێستای ئێران و هەنگاوە پێشێلکارییەکان و دۆخی نالەباری ئابووری خرایە بەرباس.
لە تەوەرێکی دیکەی کۆبوونەوەکەدا باسی خۆپیشاندانەکانی خەڵکی وەزاڵەهاتوو لە عێراق و لوبنان کرا کە لە شێوازی حکوومەتداریی نزیک لە ئێران و دەستێوەردانەکانی سپای پاسداران و گەندەڵییەکان وەزاڵە هاتوون و ناڕەزایی خۆیان دەردەبڕن.
ڕاپۆرتی سیاسیی کۆبوونەوەکە پێی وایە کە ئەم گەندەڵی و ئاڵۆزی و دۆخە نالەبارەی ژیانی خەڵک لە عێراق و لوبناندا، بەهۆی دەستێوەردان و سیاسەتە شەڕەنگێزی و ئاژاوەگێڕییەکانی ڕێژیمی تارانەوە هاتوونەتە ئاراوە و هەر بۆیە خەڵک هاواری دەرکردنی ئێران لە وڵاتەکەیان دەکەن.
لێکدانەوەی سیاسیی کۆبوونەوەکە لەسەر پشتیوانیی حیزبی دێموکرات لە داخوازیی ڕەوای خەڵکی وەزاڵەهاتووی باشووری عێراق و هەروەها پشتیوانی لە مافە ڕەوا و نەتەوەییەکانی کورد لە کوردستانی عێراق و مافە بنچینەییەکانی هەرێمی کوردستان پێداگر بوو و پیشوازیی لە هاودەنگی و یەک هەڵوێستیی لایەنە سیاسییەکانی کورد لەو بەشە لە کوردستان کرد.
کۆبوونەوەکە وێڕای هەڵسەنگاندنی هۆکارەکان و خستنە بەرباسی ئەگەرەکانی لێکەوتەی سیاسیی دۆخەکە و کاریگەرییان لەسەر کورد لە هەموو بەشەکاندا، بڕیار و ڕاسپاردەی پێویستی بە ڕێبەریی حیزب دا کە لە بەرامبەر ئەگەرە جیاوازەکاندا هەڵوێست و ئامادەکاریی پێویستی هەبێت.
بەشدارانی کۆبوونەوەکە دوای پێشکەشکرانی ڕاپۆرتەکە و شیکردنەوەکانی "مستەفا هیجری"، هەر کامەیان ڕا و تێبینیی خۆیان هێنایە ئاراوە و ڕاپۆرتەکەیان دەوڵەمەندتر کرد.
کۆبوونەوەکە ئێوارەی هەمان ڕۆژ کۆتایی پێهات.
حیزبی دێموکراتی کوردستانی ئێران
نووسینگەی کارگێڕی
١٦ی خەزڵوەری ١٣٩٨ی هەتاوی
٧ی نۆڤامبری ٢٠١٩ی زایینی
