کوردستان میدیا: حیزبی شیوعی کوردستان لە ڕاگەیەندراوێکدا دەستدرێژییەکانی ڕێژیمی ئیسلامیی ئێران و هێرشی مووشەکیی ئەو ڕێژیمەی بۆ سەر بارەگاکانی حیزبی دێموکرات مەحکووم کرد.
دەقی ڕاگەیەندراوەکە بەم چەشنەیە:
سەروەری بۆ شەھیدانی دەستدرێژی بە سەر بارەگاکانی حیزبی دێموکرات
پێشنیوەڕۆی ڕۆژی شەممە بارەگاکانی حیزبی دێموکراتی کوردستانی ئێران و حزبی دێموکراتی کوردستان لە نزیک شاری کۆیە، کە بە سەدان کیلۆمەتر لە سنووری ئێرانەوە دوورن، کەوتنە بەر هێرشی مووشەکی و هەوایی کۆماری ئیسلامیی ئێران و بە دوای ئەو هێرشەش، فڕۆکەی بێفرۆکەوان بە ئاسمانی کۆیەدا خولاوەتەوە.
جێگەی داخە لە ئاکامی ئەم ھێرشەدا ژمارەیەک لە تێکۆشەران شەهید و بریندار بوون. شایانی باسە ئەمە چەندین جارە کە خاکی کوردستانی باشوور دووچاری تۆپباران و بۆردوومانکردن لە لایەن ئێران و تورکیەوە بووە و لە ئاکامیشدا کەسانی تێکۆشەری پارچەکانی دیکەی کوردستان و کەسانی سڤیل شەھید و برینداربوون.
حزبمان تێکڕای ئەم دەستدرێژیانە تاوانباردەکات و بە پێشێلکردنی سەروەری خاکی کوردستان دەزانێ، داوا لە حکوومەتی عێراق و حکومەتی ھەرێم و ڕای گشتی و نەتەوە یەکگرتووەکان دەکات کە دەستبەجێ کار بۆ ڕاگرتنی ئەم دەستدرێژییانەی ئێران و تورکیه بکەن.
