خەڵکی پارێزگای خووزستان لە بێ ئاوی وەزاڵە هاتوون و بێکیفایەتی و کەمتەرخەمیی کاربەدەستانی ڕێژیم زیاتر بووەتە هۆی بێزاریی خەڵکی ئەو پارێزگایە.
پارێزگای خووزستان لە باشووری ئێران، یەکێک لە پارێزگا پەراوێزخراوەکان لەلایەن ڕێژیمە و بەردەوام کێشەی بێ‌ئاوی لەو پارێزگایەدا تەنگی بە خەڵک هەڵچنیوە.
لە ئیستاشدا و بەتایبەتی لە ماوەی دوو مانگی ڕابردوودا کێشەی بێ‌ئاوی زیاتر لە هەمیشە بەرۆکی خەڵکی ئەو پارێزگایەی گرتووەتەوە.
لە دۆخی قەیراناویی ئێستادا کە کۆرۆنا هەڕەشە لە گیان و تەندروستیی خەڵک دەکات، نەبوونی ئاو لەو پارێزگایەدا خەڵک زیاتر تووشی مەترسی دەکات.
هاووڵاتییەکی خەڵکی "کووی سەیاحیـ"ـی ئەهواز وتوویەتی: "٨ ڕۆژە ئاومان نییە و کرێنشینین و لەبەر بێ‌ئاوی دەمانهەوێت ماڵەکانمان بگوازینەوە، لە مانگی ڕەمەزانیشدا ئاومان نەبووە".
هەروەها هاووڵاتییەکی دیکە بەخشی "غەیزانییە" باسی لەوە کردووە کە نەبوونی ئاو و سوێربوونی ئاو تەنگی پێهەڵچنیوین و بووەتە هۆی زەرەر و زیانمان و مەڕ و ماڵاتمان لەنێو چووە.
ناوچەکانی "پەردیس، کووی سەیاحی، شاری باغمەلەک و بەشی غەیزانییە" لە نموونەی ئەو شوێنانەن لە پارێزگای خووزستان، کە لەگەڵ قەیرانی بێ‌ئاوی دەست و پەنجە نەرم دەکەن.
دوای خۆپیشانی خەڵکی ئەهواز بەهۆی نەبوونی ئاو، کاربەدەستانی ڕێژیمی تاران بەڵێنییان دا لە ماوەی ٤ ڕۆژدا ئاوی ئەو پارێزگایە دابین بکەن بەڵام ئێستا خودی کاربەدەستانی ڕێژیمی ڕایانگەیاندووە هەتا سی مانگی دیکە کێشەی ئاوی خواردنەوەی ئەو شارە چارەسەر ناکرێت.
