کوردستان میدیا: چالاکی و تێکۆشانی ئەندامان و لایەنگرانی حیزبی دێموکراتی کوردستانی ئێران، شەڕ و دووبەرەکیی خستووەتە نێودڵی کاربەدەستانی ڕێژیمەوە.
بەپێی هەواڵی گەیشتوو بە ماڵپەڕی کوردستان میدیا، لە بینای فەرمانداریی پاوە، دانیشتنێک لە نێوان فەرماندار و سەرۆکی سپای و ئیتلاعاتی ڕێژیمی ئێران بەڕێوە چووە.
هەواڵنێری ماڵپەڕی کوردستان میدیا باسی لەوە کرد، لەو دانیشتنەدا لە بارەی هەڵکردنی ئاڵای کوردستان لە چیاکانی پاوە و کار و چالاکیی ئەندامان و لایەنگرانی حیزبی دێموکراتی کوردستانی ئێران، گفتوگۆیان کردووە.
هاوکات بەپێی ئەو ڕاپۆرتە بە شێوەیەکی توند هەڕەشە لە فەرماندار، سەرۆکی سپا و ئیتلاعات کراوە.
لەو دانیشتنەدا بە سەرۆکی ئیتلاعاتی سپا گوتراوە، کە ئێوە چ کارەن بۆ ماوەی ٢ ڕۆژ ئاڵای کوردستان هەڵکراوە و خەڵک چوونەتە سەیرکردنی ئەو ئاڵایە و فیلم و وێنەیان لێ گرتووە.
دوای ئەو کۆبووونەی بەرپرسانی باڵای ڕێژیم لە شاری پاوە، بڕیاریان بە هەموو بنکە و ناوەندەکانی ڕێژیم لەو شارە داوە کە ئەندامان و لایەنگرانی حیزبی دێموکرات دەسبەسەر بکەن.
ئەو هەڵویست و هەڕەشەی کاربەدەستانی باڵای ڕێژیمی ئێرانە لە کوردستاندا دەرخەی ئەوەیە کە پشتیوانیی خەڵک لە حیزبی دێموکراتی کوردستانی ئێران هەمیشە ترس و دڵەڕاوکێی خستووەتە نێودڵی کاربەدەستانی ڕێژیمەوە.
هاوکات چالاکی و تێکۆشانی ئەندامانی حیزبی دێموکراتی کوردستانی ئێران "نا"یەکی قورسە بە دەسەڵاتی ڕێژیمی ئێران لە کوردستاندا.
