کوردستان میدیا: دۆخی نالەباری ئابووریی لە ئێران و کوردستاندا، تەنگی بە خەڵک هەڵچنیوە، بۆیە خەڵک بۆ دابینکردنی بژێوی ژیانیان لە شارەکاندا ڕوویان لە کارگەلێکی وەک ئاژەڵداری و وەرزێڕی کردووە.
لە ڕۆژانی ڕابردوودا، هەندێک وێنە لە تۆڕە کۆمەڵایەتییەکاندا بڵاوبوونەوە، کە نیشانیان دەدات لە شوێنگەلێکی وەکوو شارەکی وەرمەقانی، پردی قشڵاخ و هەروەها لە داوێنی کێوی ئاویەری شاری سنە، خەڵک خەریکی لەوەڕاندنی مەڕ و ماڵاتێکی زۆر لە فەزای سەوزی شاردان.
بوونی مەڕ و ماڵات لە نێو شاردا، بەتایبەت لە وەرزێکی وەکوو بەهاردا کە ڕێژەی سەردانی میوان بۆ ئەو شارە زۆرە، جیا لەوەی کە پێناسەی شار و شارنشینی دەباتە ژێر پرسیارەوە، زیانێکی زۆری بۆ فەزای سەوزی شار هەیە و پیسبوونی شارەکەشی بەدواوە دەبێت.
کارگەلێکی وەکوو ئاژەڵداری و وەرزێڕی لەو دەستە کارانەن، کە لە لادێ و گوندەکاندا ئەنجام دەدرێن و لەگەڵ سروشتی شاردا یەک ناگرنەوە، بۆیە ئەنجامدانی ئەو کارانە لە شارەکاندا دیمەنێکی نامۆیە و ناڕەزایەتیی خەڵکی بەدواوە بووە.
هۆکاری سەرەکیی ئەم دیاردەیە بۆ بەرزبوونەوەی ئاستی هەڵاوسانی ئابووری لەم شارە و زۆربوونەوەی ڕێژەی بێکاری دەگەڕێتەوە، کە خەڵک ناچارن بە هەر شێوازێک کە بووە، بۆ دابینکردنی بژێوی ژیانی خۆیان و تێچووەکانی ژیان ڕێگایەک لە بەر بگرن.
