لە شار و گوندەکانی کوردستانی ڕۆژهەڵات هەتا ئێستا بەردەوام خەڵک لە سەر تێچوو و زەحمەتی خۆیان بۆ پێشگرتن لە کۆرۆنا شوێنە گشتییەکان به دەرمانی دژەگەند دەپڕژێنن.
ڕۆژانی پێنجشەممە وهەینی چەند گوندێکی مەهاباد لەسەر تێچووی خۆیان و بە هاوکاریی خەڵکی خۆبەخشەوە کۆڵان، گەڕەک، شەقام و شوێنە گشتییەکانیان بە دەرمانی دژە گەندە پڕژاندووە.
گوندەکانی مەهاباد وەک "سۆیناس، کاولانی خوارێ، بەیتاس، گاگەشی سەرێ و خوارێ" لەلایەن خەڵکەوە خراوەتە دابڕگەوە.
هەروەها لە شنۆ لە شوێنەکانی وەک نەڵۆس، هەروەها گوندی "سەوجه" خەڵک بە تێچووی خۆیان شوێنە گشتییەکانیان پڕژاندووە.
دووکان و بازاڕەکانی "دزەی مەڕگەوەڕ" بەهۆی کۆرۆنا لەلایەن خەڵکەوە خۆڕسک داخراوە و خەڵکەکە بۆخۆیان دەستیان بە دابڕگەکردنی شارۆچکەکە کردووە.
ڕێژیمی ئێران لە کاتی قەیرانەکاندا یارمەتی بە خەڵک نادات و خەڵک خۆیان دەست بەکار دەبن.
لە شار و گوندەکانی کوردستان تەنیا خەڵک بە کەرەستە و لەسەر تێچووی خۆیان شار و گوندەکانیان بە دەرمانی دژەگەند پڕژاندووە.
لە هەندێک لە شارەکان خەڵک کەمپەینیان بۆ کردنەوەی یارمەتی دامەزراندووە و ئەو یارمەتییانەیان بە دەستی خەڵک گەیاندووە.
