کوردستان میدیا: خەڵکی کوردستان لە گرانیی کەلوپول و پێداویستییەکانی ژیان دەناڵینن و دەڵێن، گرانی بووەتە هۆی ئەوەی کە نەتوانین بۆ نەورۆزی ئەمساڵ هیچ شتێک بکڕین.
بە پێی ڕاپۆرتێک کە لە هەواڵدەریی حکوومەتیی فارسدا بڵاو کراوەتەوە، خەڵکی شاری سنه لە گرانیی کەلوپەل و بێکاری دەناڵێنن و دەڵێن: گرانی و نەبوونی داهات لە ئاستێکدایە که توانایی کڕینمان نەماوە و تەنیا لە بازاڕەکاندا دەگەڕێین و چاو لە شتەکان دەکەین.
بە وتەی دووکاندارەکانی شاری سنە، بازاڕی فرۆش لە ڕۆژانی کۆتایی ساڵ و لە بەرەبەری نەورۆزدا دابەزینێکی زۆری بەخۆیەوە بینیوە بە شێوەیەک کە هەندێکیان ئاماژه به دابەزینی زیاتر له ٦٠ لەسەدیی فرۆشی خۆیان لە مانگی ئاخری ساڵدا دەکەن.
یەکێک لەم دووکاندارانە دەڵێت: خەڵکێک که ناتوانن زگیان تێر بکەن چۆن ئەتوانن بیر بەوە بکەنەوە کە کەلوپەلی نوێ بۆ ماڵەکانیان بکڕن و لە بیری گۆڕینی دێکۆراسیۆنی نوێ بۆ ماڵەکانیان بن.
هاووڵاتییان وێڕای ئاماژه بە گرانی، باس لە بێکاربوونی منداڵەکانیان دەکەن کە بە هەبوونی ڕادەی خوێندەواری لە ئاستی سەرەوەدا هێشتا کاریان دەست نەکەوتووە ؛ ئەوان هەروەها، باس لە جیاوازی نرخەکانی ساڵی ڕابردوو و ئەمساڵ دەکەن و دەڵێن: بەرپرسان و ئاغازادەکان بێن و بزانن ئایا خەڵک دەتوانن پێداویستییەکانی نەورۆز و ساڵی نوێ بکڕن ؟
لەم ڕاپۆرتەدا خەڵک باس لەوە دەکەن کە گرانی و بێکاری بووەتە هۆکاری ئەوەی کە لە بەرانبەر بنەماڵەکانیاندا شەرمەزار بن.
گرانی، دابەزینی نرخی ئەرز و نابەرپرسایەتیی کاربەدەستانی ڕێژیمی ئێران سەرەکیترین هۆکارەکانی درووستبوونی ئەم حاڵەتەن کە خەڵکی کوردستان لە بەرەبەری ساڵی نوێدا لەگەڵیان بەرەوڕوو بوونەتەوە.
