کوردستان میدیا: ڕێژیمی ئیسلامیی ئێران لە ویجهەی مەزهەبی و ئیسلامیی خەڵکی ئیران و کوردستان بۆ بەرژەوەندییەکانی خۆی کەڵک وەردەگرێت.
بەپێی هەواڵی گەیشتوو بە ماڵپەڕی کوردستان میدیا، ڕێژیمی ئیسلامیی ئیران بە بڵاوکردنەوەی "تەلیس" بە نێو جووتیاراندا و لە ڕێگای دامەزراوەکانی خۆی وەکوو شۆرا و دێهیارییەکان، بە ناوی زەکات گەنم و جۆ لە وەرزێڕەکان وەردەگرێت و ئیدەعا دەکات به سەر فەقیر و هەژاراندا دابەشی دەکات.
ئەگەرچی خەڵکی ڕۆژهەڵاتی کوردستان خۆیان یارمەتی بە خەڵکی لێقەوماو و هەژار دەدەن، بەڵام باوەڕیان بە ڕێژیم نییە کە زەکات و یارمەتییەکان لە لایەن ڕێژیمەوە بە خەڵکی هەژار بدرێت.
هاوکات لەو چەند ساڵەی دواییدا، بە دوای مێهروەرزیی خەڵک بۆ لێقەوماوانی ڕووداوە سروشتییەکان کە بەسەر خەڵکی ئێران و کوردستاندا هات، خەڵکی مرۆڤدۆستی ئێران و کوردستان بە هەموو توانای خۆیانەوە یارمەتیی لێقەوماوانیان دا.
خەڵکی کوردستان و ئێران لەو باوەڕەدان کە هیچکات هاوکارییەکانیان، وەک باقیی هاوکارییەکانی دیکە، لە لایەن ڕێژیمەوە به دەستی لێقەوماوان و هەژاران ناگات.
خەڵکی کوردستان بەهۆی ئەوەی کە متمانەیان بە ڕێژیم نەماوە، بۆ خۆیان و بە شێوەی سەربەخۆ، سەرەڕای هەموو تەنگ و چەڵەمەکان، هاوکاریی هەژاران دەکەن.
