كه‌ریم په‌رویزی
ده ساڵ دوای یه‌كگرتنه‌وه‌ی ڕیزه‌كانی حیزبی دێموكرات له ساڵی ١٣٧٥ی هه‌تاویدا و چوارده ساڵ پێش ئێستا، له ١٥ی سه‌رماوه‌زی ١٣٨٥ی هه‌تاویدا، جارێكیتر دابڕانێك له ڕیزه‌كانی ئه‌م حیزبه خاوه‌ن ئه‌زموون و خه‌باتكاره‌دا ڕووی دایه‌وه و نیگه‌رانیی زۆری لای دۆست و لایه‌نگر و دڵسۆزانی حیزبی دێموكرات و خه‌باتی كوردستانی ڕۆژهه‌ڵات پێك هێنا.
به‌خۆشیه‌وه، باس و دیالۆگ و كه‌شی وه‌سه‌ریه‌كخستنه‌وه‌ی ڕیزی تێكۆشه‌ران و یه‌كگرتنه‌وه‌ی ڕیزه‌كانی حیزبی دێموكراتی كوردستانی ئێران، له ئێستادا گه‌رموگوڕتر هاتۆته‌وه ئاراوه و هه‌موو خوازیاری ئه‌وه‌ن كه هه‌رچی زووتر ئه‌و مزگێنییه بدرێ كه دووباره ڕیزی تێكۆشه‌رانی دێموكرات له په‌نای یه‌كن و ساڕێژی برینه‌كانی ڕابردوو ده‌كرێته‌وه.
له مێژووی سێ چاره‌كه سه‌ده‌ی خه‌باتی حیزبی دێموكراتی كوردستانی ئێراندا، چه‌ندین جار دابڕان له ڕیزه‌كان ڕووی داوه و دووباره ڕیزه‌كانی تێكۆشه‌ران وه‌سه‌ریه‌ك خراونه‌ته‌وه و ئه‌مه ئه‌و بابه‌ته ڕوونه‌مان پێ ده‌ڵێ كه دێموكراتبوون بۆته پێناسه‌یه‌ك كه له ڕه‌وتێكی خه‌بات و تێكۆشان و گیانفیدایی مێژووییدا بۆ ڕێبوارانی ئه‌م ڕێگایه ماوه‌ته‌وه و هه‌رجۆره دابڕانێكی ته‌شكیلاتی نه‌بۆته هۆی پشتگوێخستنی ناسنامه و دابڕانی پێناسه و بۆیه‌شه دووباره باس له یه‌كگرتنه‌وه ده‌كرێته‌وه و دووباره به پێشوازیی یه‌كگرتنه‌وه ده‌چینه‌وه.
به‌ڵام ده‌بێ ئه‌وه‌مان لا گرنگ بێ كه چۆن ده‌ڕوانینه یه‌كگرتنه‌وه؟ ئایا كاتێك باس له یه‌كگرتنه‌وه چ له حیزبی دێموكراتدا و چ یه‌كگرتوویی له نێو ڕیزی تێكۆشه‌رانی كورد به گشتی و یه‌كگرتوویی حیزبه كوردییه‌كان ده‌كه‌ین، یه‌كگرتنه‌وه لای ئێمه بریتییه له چی؟ ئایا بۆ یه‌كگرتووبوون پێویسته بتوێینه‌وه و دووباره شكڵ بدرێینه‌وه و له‌ڕاستیدا یه‌كگرتووبوون به‌مانای توانه‌وه‌ی ڕه‌نگ و سه‌لیقه و سیماكانمان دێ و كاتێك یه‌كگرتووبوون به ته‌واو ده‌زانین كه توانه‌وه هاتبێته ئاراوه؟
له ڕوانگه‌یه‌كی وه‌هاوه كه باس له یه‌كگرتوویی كورد بكه‌ین و بمانهه‌وێ هه‌موومان وه‌كوو یه‌ك بیر بكه‌ینه‌وه و هه‌موومان یه‌ك سیما و یه‌ك ڕه‌نگمان هه‌بێ، ئه‌گه‌ر ئیمكانی هه‌بێ، ئه‌وه ته‌نیا فاشیزمی لێ ده‌كه‌وێته‌وه به‌ڵام نه ئیمكانی هه‌یه و نه به ئاكاممان ده‌گه‌یه‌نێ؛ به‌ڵكوو وه‌ها بیركردنه‌وه‌یه‌ك نه‌ك ئیمكانی نییه به‌ڵكوو ته‌نیا و ته‌نیا دابڕانی دیكه و په‌رته‌وازه‌یی كوردی به‌دوادا دێ.
له دوای ئه‌م هه‌موو ئه‌زموونانه‌ی كه كورد به گشتی و كوردستانی ڕۆژهه‌ڵاتیش به‌تایبه‌تی كردوویانه، ئێمه پێویسته جۆرێكی دیكه له یه‌كگرتوویی بڕوانین، كه مانای توانه‌وه و دابڕانی دیكه‌ی لێ شین نه‌بێته‌وه به‌ڵكوو پێویسته كه یه‌كگرتوویی ببێ به‌و مانایه كه به‌ده‌وری یه‌ك كۆمان ده‌كاته‌وه و پێكه‌وه‌بوونمان لێ دروست ده‌كا.
له نێو حیزبێكی یه‌كگرتووی دێموكراتدا پێكه‌وه‌بوون یانی به پاراستنی ڕای كه‌سی و تایبه‌تی خۆمان، به‌ڵام له پێناوی به‌رژه‌وه‌ندییه‌كی باڵاتردا، به پێبه‌ندی به به‌ڵێنه‌كانمان و ده‌روه‌ستیمان به‌رامبه‌ر به ڕێككه‌وتن و یاسامه‌ندیی خۆكردمان، هێزێكی گه‌وره‌تر دروست ده‌كه‌ین بۆ به‌ره‌وپێشبردنی خه‌باتی نه‌ته‌وه‌یه‌كی سته‌ملێكراو و له‌سه‌رپێ. ئامانجی سه‌ره‌كیمان به‌هێزكردنی خه‌باتی گه‌ل دژ به كۆلۆنیالیزم بێ.
له سه‌ر سێ ڕێیانی دابڕان، پێكه‌وه‌بوون و توانه‌وه‌دا، ڕاسته‌ڕێی پێكه‌وه‌بوون، هه‌م به‌رژه‌وه‌ندیی باڵامان دابین ده‌كا و هه‌م كه‌سایه‌تیی تاك و مێژووییشمان به‌هێزتر ده‌كا و هێزی خه‌باتمان بۆ به‌گژداچوونه‌وه‌ی داگیركه‌ر زیاتر ده‌كا.
