کوردستان میدیا: ئاگرتێبەردانی دارستان و لێڕەوارەکانی کوردستان کات و وەرز ناناسێت و بەردەوام لەژێر هەڕەشە و هێرشەکانی نەیارانی ژینگەدایە.
ڕۆژی سێشەممە، ٣ی بەفرانبار، دارستانەکانی گوندی "بەردەڕەشە" سەر بە مەریوان، لەلایەن مۆرەکانی ڕێژیمەوە ئاگریان تێبەردرا.
لە کاتژمێرەکانی یەکەمی ئەو ئاگرکەوتنەوەیەدا، ژینگەدۆستان و ئەندامانی "ئەنجومەنی سەوزی چیا"ی مەریوان، دەستیان بە کوژاندنەوەی ئاگرەکە کردووە.
هاوکات کێوەکانی گوندی "نووریاو" سەر بە پاوە، بوون بە قوربانیی ئاگر، ئەو ئاگرەش لەلایەن ئەنجومەی "ژیوای" و ژینگەدۆستانی ناوچەکەوە کوژرایەوە.
هەروەها چەند ڕۆژ پێش ڕێکەوتی ١ی بەفرانبار، لە ١٠ لایەوە ئاگر بەردرایە زەلکاوەکانی زرێبار و خەسارێکی زۆر بەر ژینگەی ئەم گۆلە گەیشت.
هەژمارێکی زۆر لەم ئاگرکەوتنەوانە لە ڕێگای دەستوپەیوەندییەکانی ڕێژیمی ئێرانەوە بە چەند مەبەستی سەرەکیی "لەنێوبردنی ژینگە و دارستانەکانی زاگرۆس، کاولکردنی لێڕەوارەکان و سەرچاوە سروشتییەکان و هەروەها بە مەبەستی سیاسیـ"ـش لە کاتە هەستیارەکاندا بۆ "بەلاڕێدا بردنی زەینی خەڵک لە ڕووداوەکان" ئەنجام دەدرێت.
