دەرمانسازەکانی ئێران بەنیسبەت وادە و بەڵێنیی وەزارەتی تەندروستیی ڕێژیم بەتوندی ڕەخنەیان گرت و باسیان لەوە کردووە، کاربەدەستان لەو وەزارەته یارمەتیی پێویست بە هاووڵاتییان نادەن.
پزیشکەکانی کوردستان و ئێران وتوویانە، وەزارەتی تەندروستیی ڕێژیم چەند حەتوو لەمەوبەر وادەی دابوو کە دەمامک و کەلوپەلی پزیشکی بە دەرمانخانەکان بدات بەڵام هەتا ئێستا ئەو کارە ئەنجام نەدراوە.
کەلوپەلی پزیشکی لە شارەکانی کوردستان و ئێراندا کەمە و خەڵک بۆ دەمامکێک دەبی چەند کاتژمێر لە سەفی دەرمانخانەکاندا بن.
هاوکات ڕێژیمی ئێران ئەلکۆل و دەرمانی دژەگەندی ساختەی ڕەوانەی بازاڕ کردووە.
لەلایەکی دیکەوە یارمەتییەکانی جیهانی کە بە ئێران دراوە لەلایەن خودی سپای پاسدارانەوە لە بازاڕدا فرۆشراوەتەوە.
خەڵک بە شێوەی خۆڕسک و لەسەر تێچووی خۆیان کەلوپەلی پێشگری لە کۆرۆنایان کڕیوە.
لە شار و گوندەکان، خەڵک بە یارمەتیی یەکتر شەقام و شوێنە گشتییەکانیان بە دەرمان پڕژاندووە.
هەروەها لە زۆربەی شارەکانی کوردستان کەمپەینی یارمەتی بە هاووڵاتییان دامەزراوە کە دەمامک و کەلوپەلی دیکە بە هاووڵاتییان دەدەن.
لەو قەیرانەدا ڕێژیمی ئیسلامیی ئێران تەنیا خەریکی شاردنەوە و سەرپۆشکردنی ئەو کێشەیە بووه.
