لە درێژەی ئاگرکەوتنەوەکانی کوردستان، دەیان هێکتار لە دارستان و لەوڕگەکانی سەردەشت و مەریوان ئاگریان تێبەردرا.
ڕۆژی هەینی ٧ی جۆزەردان، دارستانەکانی نێوان "کۆڵسه و زێرە مێرگ" سەر بە شاری سەردەشت ئاگری تێبەردرا.
چالاکێکی ژینگەیی وتوویەتی: "ئەم ئاگرکەوتنەوەیە هەتا کاتژمێر ٧ی بەیانیی ڕۆژی شەممە ٨ی جۆزەردان بەردەوام بوو و لە کۆتاییدا ئەم ئاگرە بە هەوڵی چالاکانی ژینگەیی ئەنجومەنی بژوین چیای سەردەشت پێشی پێ گیرا و ئاگرەکە کوژایەوە".
هاوکات دەیان هێکتار لە دارستانەکانی ''مووسک، لێو و مڕانە'' سەر بە شاری مەریوان بەهۆی ئاگرکەوتنەوە سووتان.
ئەو ئاگرکەوتنەوانە چەندین ساڵە بە شێوەی ئاشکرا لە کوردستانی ڕۆژهەڵات دەستی پێکردووە و ساڵانه بەهۆی سووتانی دارستان و لەوڕگەی ناوچەکانی کوردستان بەشێکی زۆر لە شوێنی حەوانەوەی گیانلەباران و ئێکۆسیستمی ناوچەکە لەنێو دەچێت.
هاووڵاتییانی کوردستان باس لەوە دەکەن کە ئەو ئاگرکەوتنەوانە دەستکردن و بەشێکی زۆریان لەلایەن ئەندامانی سپای پاسدارانەوە بۆ تێکدانی ژینگە و سروشتی کوردستان ئەنجام دەدرێت.
