کۆرسێک لەژێر ناوی ''پێناسەیەک بۆ زمان و ئەدەبی کوردی'' لە زانکۆی ''تۆرێنتۆ''ی کانادا لە بەشی شارستانییەتی ڕۆژهەڵاتی نێوەڕاستی زانکۆی تۆرێنتۆ، دەکرێتەوە.
لەو کۆرسەدا ئاماژەیان بەوە کردووە کە گرنگی دەدرێت بە ''مێژووی زمانی کوردی''، ''هەمەچەشنی''، ''لقەکانی زمانی کوردی'' و کاریگەریی هەر یەک لە زمانەکانی عەرەبی، فارسی و تورکی لەسەر زمانی کوردی.
هەر لەو پەیوەندییەدا باس لەوە کراوە کە گرنگیی زۆریش دەدرێت بە ئەدەبی کوردی و پێداچوونەوە و هەڵسەنگاندنی شێعری وەرگێڕدراوی کوردی بە زمانی ئینگلیزی.
هەروەها پەخشان و چیرۆکی کوردی لە کۆرسی زانکۆی تۆرێنتۆدا گرنگیی پێ دراوە.
هەروەها زانکۆی تۆرێنتۆی کانادا ڕایگەیاندووە، بڕیارە ئەو کۆرسە لە هاوینی ئەمساڵدا دەست بە کارەکانی خۆی بکات و بۆ ماوەی دوو مانگیش بەردەوام بێت.
زانکۆی تۆرێنتۆ یەکێک لە کۆنترین و ناودارترین زانکۆکانی ئامریکای باکوور و جیهانە کە ساڵی ١٨٢٧ی زایینی دامەزراوە و لە ئێستادا زیاتر لە ٦٠ هەزار خویندکار لەو زانکۆیەدا دەخوێنن.
