کوردستان میدیا: چالاکان، لایەنگران و ئەندامانی حیزبی دێموکراتی کوردستانی ئێران، له زانکۆی ڕازیی کرماشان به بڵاوکردنی راگەیەندراوێک وێڕای پاڵپشتی خۆیان له هێزی پێشمەرگه، حیزبی دێموکرات و بەردەوامبوونی ڕاسانی خۆرهەڵات و هەروەها مەحکوومکردنی مووشەکبارانی بنکەکانی حیزب دێموکرات، داوایان لە خەڵکی ڕۆژهەڵاتیش کردووە، کە پەیوەست بە مانگرتنی سەرتاسەری ببن.
وە ناو بەرزناوێ کوردستان
خەڵک شەرەفدار و قەدردار کوردستان؛ هە ئەو جوورە ک خەوەر دیرین، ڕووژ شەممە ڕێکەفت هڤدەی خەرمانان ١٣٩٧ خوەرین، کۆمار پەت و سێدارەی ئسلامیی ئێران جارێگ‌تر و وە پێچەوانەی داوای خەڵک مەدەنی، چاڵاکەیل سیاسیی کوردستان، چاڵاکەیل ماف مرۆڤ و کووڕ و کۆمەڵەیل ماف مرۆڤ و ناونەتەوەیی، سێ ڕووڵەی پاک و چالاک سیاسی وڵاتمان وە ناوەیل "ڕامین حوسێن‌پەناهی"، "زانیار مورادی" و "لوقمان مورادی" وە سێدارە دادن و هاووەخت وەگەرد ئی کردەی نامرۆڤانە و دژه بەشەرییە سپای تێرۆریستیی پاسداران بنکە و بارگایەیل حزب دمۆکرات لە کۆیە کردە ئامانج ئاگر ڕق و کینە و مووشەکواران خوەی.
وەداخەو لە ئاکام و نەتیجەی ئی کردەی تێرۆریستی و شکانن یاسای ناونەتەوەیی و یاسای سەروەری وڵاتەیل، ژمارێگ لە کادر و پێشمەرگەیل و خەڵک مەدەنی دانیشتێی ئی کەمپەیلە گیانیان بەخت ڕێ پڕ وەشانازی ئازادی کورد و کوردستان کردن و چەند کەسێگ‌تر لە هاوڕێیەیلێیان زامدار بین.
کۆمار تێرۆریستی ئسلامی وەگەرد ئی کردەیل وەحشیانە و دژ وە بنەمایل ئەخلاق و ماف مرۆڤ، توایدن ک ئرادەی مافخواز و ڕەوای نەتەوەی کورد لە ڕۆژهەڵات کوردستان شکەست بیەیدن و بوودە بایس وە دۊیا نیشتن و ترسانن خەڵکێ کورد و دەسهەڵگردنیان لە خەبات ئەڕای داهاتوو گەش و پڕهیوای نەتەوەگەمان لە ئی بەش کوردستانە. وەڵام وەپێچەوانەی ئی ئامانج فاشیستی و شوونیستی کۆمار ئسلامییە، نەتەوەی کورد و ڕووڵەیل ئی وڵاتە فرەتر لە پێش وە بان خەبات ڕەوا و ئنسانییان ئەڕای ڕەسین وە مافەیل نەتەوەیی و دمۆکراتیک خوەیان لە چوارچێوەی ڕاسان شاخ و شار، سوورتر بینە.
نەتەوەی کورد لە دریژەی خەبات ئەڕای ئازادی لە هەر چواربەش کوردستان، چەندین کەڕەت تۊش ژینۆساید، ئەنفال، کیمیاییواران، کوشیان، سێدارە، ئاسیمیلاسیۆن و ... بییە، وەڵام هەر جارێگ قایمتر و سوورتر لە جار پێشین پا ناسە ناو مەیدان خەبات و سەرهەڵدان و هۊچ وەخت لە داخوازییەیل ڕەوای خوەی دەسهەڵگر نەوییە و یەیشە نیشان دەیدن ک خەیاڵ کۆمار ئسلامی و داگیرکەرەیل کوردستان ئەڕای نواگیری لە ڕەسین نەتەوەی کورد وە ئامانجەیل بەرز و پیرووزی خاوە.
وە بوونەی ئی جنایەتە دژه بەشەرییەی کۆمار ئسلامی ئێرانە ک لە ئاکامی ڕامین و لوقمان و زانیار وە سێدارە دریان و هێرش وەحشیانەی سپای پاسداران وە سەر بنکەیل حزب دمۆکرات و کوشیان و زامدار بین موبارزەیل ڕاستەقینەی ڕێ ڕزگاریی کوردستان لە فاشیست و داگیرکەرەیل و خەڵک مەدەنی و مناڵەیل بێتاوان دانیشتێی کەمپەیل حزب لە کۆیە، ئیمە چالاکەیل خوێندکاری کورد زانکۆی ڕازی و ئەندامەیل تەشکیلات نهێنی حزب دمۆکرات کوردستان ئێران لە شار کرماشان سەرەخوەشی خوەمان ئاراستەی بنەماڵەیل سەربەرز ڕامین حوسەین‌پەناهی و لوقمان و زانیار مورادی و شەهیدەیل حزب و کادر و پێشمەرگەیل گیان لەسەر دەسێ دمۆکرات کەیمن و پڕ وەدڵ هیوای سڵامەتی بریندارەیل ئی کارەساتە توایمن و جارێگتریش پەیمانمان وەگەرد خۊن شەهیدەیل و حزبە خۆشەویستەگەمان حزب دمۆکرات کوردستان ئێران دوارەوە کەیمن و وە دژبەرەیل نەتەوە و وڵاتمان ئیویشیمن ک هەزاران ڕووڵە و ڕێوار ڕێ دوکتور قاسملووی نەمر ئامادەی گیانفدایی و پەیوەست بین وە ڕاسان شاخ و شار لە شوون وە شوون وڵاتمان کوردستان، هەر لە ماکوو هەتا ئیلام و لوڕستان هەن ک تا ڕزگاریی کورد و کوردستان لە داگیرکەرەیل لە پا نیوەسن.
هە ئەیجوورەیش داوا لە کۆمەڵگای ناونەتەوەیی و ڕێکخراوەیلێ ماف مرۆڤ کەیمن ک هەرچێ زۊتر نوای ئی کردەیلێ تێرۆریستی سپای پاسداران و کۆمار ئسلامی ئێران، دژ وە نەتەوەی کورد و ئاسایش و ئارامش ناوچەگە بگرن و مەحکوومێ بکەن. داوامانیش لە کۆمەڵگای مەدەنی و خەڵک غیرەتمەند ڕۆژهەڵات کوردستان یەسە، ک لە بەرانبەر جنایەتەیل کۆمار ئسلامی ئێران بێدەنگ نەون و ڕووژ چوارشەممە ڕێکەفت ٢١ی خەرمانان ١٣٩٧ خوەرین وە شێوەی یەکدەنگ و یەکگردێ لە مانگرتن گشتیی ڕۆژهەڵات دژ وە تاوانەیل کۆمارێ ئسلامی بەشدار بن.
شەهید نامرێ
بڕووخێ کۆمار پەت و سێدارەی ئسلامی
بژی ڕاسان
