دیار
سازمان تروریستی سپای پاسداران و لەق و بەشەگانی وە هەماهەنگی و وەرپرسایەتی خامنەیی ، بەشێ سەرەکی سیستم دیکتاتوری ڕێژیم جومهوری ئسلامییە، ک لە گشت بەشەگانێ ئەو سیستمە دەس درێد وە تایبەتی بەش ئەمنیەتی و ئابووری.
ساڵیانییگە ک ڕێژیم هەوڵ دەی سپای پاسداران بکەیدە سەرەکی ترین بەشێ نزامی سیستم و ئەرتش ک ماهیەتییگ مەردومی درێد لاوازەو بکەید، و ساختار سپای پاسداران وە شێوازییگ داڕشیاس ک کەسانێ نزیک وە خامنەیی و تاسەر پابەند وە نزام لەو سازمانە جیگیر کریانە.
ئەو هەوڵەیلێ ڕێژمە کارییگ کردیە ک ئمڕووژ سپای پاسدداران لە ناو سیستم وە دەستور خامنەیی باس سەرەکی کەی و لە سیاسەت، ئابووری، وەرزش، پەروەردە، بەش سربازی، دیپلوماسی و فرە بابەت ترەک و هوێرد تر دەس درێد و کونترول گشت بەشەگان وە چاودێری خامنەیی گردیەسە دەس.
تا ئێرنگە چەندین بەشێ سپای پاسداران وە تایبەتی بەشێ دەرەوەی وڵات یانی سپای قودس کەفتنەسە ناو لیست ترور و لە ناوچەگە و جەهان چالاکی تروریستی کەن ئەڕای شیوانن ئەمنیەت ناوچەگە و نەزم جەهانی تا ڕێژیم جومهوری ئسلامی بەردەوام بمینێد و خامنەیی تەنیا نەماینەدەی خودا و ڕەهبەر موسلمانەیل جەهان بوودن.
ئی ماهیەت سپای پاسدارن نە تەنیا ئەڕای مەردومان ئێران کەفتیەسەو دەر، بەڵکە کۆمەڵگای جەهانیش وە خاسی زانن ک ساختار ئەو سازمانە وە چ شیوازییگ داڕشیاس و هەدەفەگانی چەن.
لە دەیەی لەیەوەری تا ئمڕووژ جیا لە زوورزماکیەگانێ ناو خودێ سیستم جومهوری ئسلامی ئەڕای دەسەڵاتداری، کۆمەڵگای جەهانی وە تایبەت ئامریکا و ئسرائیل هەوڵ دەن ک ئی بەشە لە نزام بخنکنن و لە ڕاسی باڵ سەرەکی خامنەیی و پاڵپشتی بەیت ڕەهبەری لەبەین بووەن.
لەی ناوە ئسرائیل وە کردەوە دەس کردیەسە لەبەین بردنێ کەسایەتییە بەرزەگان ناو سپای پاسدران ک مدووی سەرەکی شیوانن ئاسایش جەهانی و وە تایبەتی گەوراترین هەڕەشەن لەسەر وڵات ئسرائیل، ک ڕێژیم بەردەوام شوعار لە بەین بردنێ ئەو وڵاتە دەیدن.
تا ئیرنگە سەدان کەس وە فەرماندەگانێ سپای پاسداران ڕێژم لە ناو ئێران و دەرەوەی ئێران کوشریانە و ڕێژیم وە پروپاگاندا هەوڵ دەی نیشان بییەی ک هوێچ خەسارییگ نەکەفتیەسە سپای پاسداران و ئە سازمانە هەر بەردەوامە و سیستم نزام جومهوری ئسلامی ئەمن دەسڕشی وەلێ ئمکان نەیرێد.
وەلی چالاکییەگان ئسرائیل وە خاسی دەریخست ک گشت بەشەگانێ ڕێژیم لاوازن و ئەو باس و بابەتە ک خامنەیی لەسەر ئەمنیەت کەی تەنیا شوعار و پروپاگانداس.
خامنەیی ک فەرماندەی گشتی گشت هازە نزامییەگانە، لەی سیستمە خوەی وە تەنیا وەڕیەوەر زانێد و وە شێوازیی بەرنامە ڕیزی کردیە و موهرە چنیە ک نەفەر یەکەم ئەو دەسەڵاتە بوود و نەفەرە نزیکەگان وە خوەی لە گشت بەشەگان سازمان داس و پاڵپشتی لە سپای پاسدران کەی ئەڕای مەنن خوەی.
وەلی ئمڕووژ دوێنیمن ک هەر ڕووژ خەوەرییگ لە گەندەڵی ئابووری لە ناو ئێران کەفێدە دەیشت ک سپای پاسدارن و فەرماندەگانی ئەسڵیەگانن و هەواڵ لەبەین چین فەرماندە سەرەکییەگان وڵاو کریەی.
ئی باس و بابەت و هەواڵەیلە ترس خستەسە دڵی خامنەیی و وەیجوورە ک دیارە درێد سازماندەیی تازە کەی لەناو سپای پاسداران وە شێوازییگ ک نەفەر یەکەم ئتلائات سپای پاسداران حوسەین تائێب لابردێە و کردیەسە موشاورێ فەرمامنەدی سپای پاسداران.
ئی بابەتە نیشان دەی ک ڕێژیم ساختاری درێد شیوەیەی و جەریانەگانی ناو خودێ ڕێژیم ململانی کەن ئەڕای دەسەڵات وە تایبەت دوای مردن خامنەیی و لە لای تریش وەرپرسەیل بانێ ڕێژم باس لەوە کردنە ک بەش ئەمنیەتی ڕێژم تووش گرفت هاتییە و زانیارییەگان لەناو خودێ سپای پاسداران تیەنەو دەیشت.
یە یەکمجار نییە ک خامنەیی لە دووخەیل جیاواز دەس بەیدە سازماندەیی تازە و کۆمەڵییگ کەس کەیدە قوربانی مەنن خوەی و نەفەرات تازە ک دەسپەروەردەی خوەین تیەرێدە سەر کار.
وە گشتی سپای تروریستی پاسداران ڕێژم ک ئەرکە سەرەکییەگەی پارێزگاری لە ڕێژمە ساختاری شیویاس و ئەڕامان ئی ڕاسییە دەر خەی ک سیستم وە گشتی تووش گیچەڵ بییە و جوور دارییگ ک ڕیشەی نەمەنییە و پەل و پووەگانی لە ناوەو خوریانە و پووک بیە و داڕزیاس، هشکەو بوون و ڕمیانی لە هەمیشە نزیکترە.
