دەزگای ڕێکخستنی گشتیی حیزبی دێموکراتی کوردستانی ئێران بەنیسبەت هاوخەمی و هاودەردریی خەڵکی کوردستان بۆ شەهیدبوونی کاک "لوقمان مێهفەر" ئەندامی ناوەندی سیاسیی حیزبی دێموکراتی کوردستانی ئێران پەیامی سپاس و پێزانینی بڵاو کردەوە.
دەقی پەیامەکە بەم چەشنەیە:
ئەندامان و لایەنگرانی حیزبی دێموکراتی کوردستانی ئێران
هاوڕێ و هاوخەباتەکانی شەهید لوقمان مێهفەر
لە ڕێکخستنەکانی نێوخۆی حیزبە تێکۆشەرەکەمان
لەدەستدانی کەسایەتیی هەڵسوڕ و ماندوونەناسمان؛ لە ڕیزی کادری ڕێبەرایەتی و هاوکاری دەزگای ڕێکخستنی حیزبەکەمان خەسارێکی گەورە و داخێکی گران بوو کە لە هەزاران پەیامی پرسە و سەرەخۆشی، پەیمان نوێکردنەوە و هاوخەمیتاندا بۆ دەزگای ڕێکخستنی حیزبەکەمان ڕەنگی دایەوە.
دەزگای ڕێکخستنی حیزبی دێموکراتی کوردستانی ئێران وێڕای سەرەخۆشی لە تاک و شانە و کۆمیتەکانی ڕێکخستنی حیزبەکەمان، سپاس و پێزانینی خۆی دەردەبڕێ و دڵنیایە لە درێژەدانی ڕێگا و ڕێبازی شەهیدانمان تا وەدەستهێنانی ئامانجی گەلەکەمان کە ئاواتی شەهید لوقمان مێهفەری هاوڕێمان و هەموو شەهیدانی بزووتنەوەی ڕزگاریی گەلەکەمانه.
حیزبی دێموکراتی کوردستانی ئێران
دەزگای ڕێکخستنی گشتی
٢٥ی خاکەلێوەی ١٤٠٠ی هەتاوی
