ڕۆژی یەکشەممە ڕێکەوتی ١٠ی گەلاوێژ "حوجەت جەباری" جێگری پاراستنی ژینگەی پارێزگای ورمێ ڕایگەیاندووە تاڵاوەکانی "قۆپی باڵباڵی و قەرەشڵاغی مەهاباد و قەرەگۆلی بۆکان" وشک بوونە.
"جەباری" وتوویەتی "دابیننەکردنی حەقەئاوی ئەو تاڵاوانە، کەمیی ڕێژەی بارینەکان و وشکەساڵی سێ هۆکاری سەرەکی وشکبوونی ئەو تاڵاوانەن.
پارێزگای ورمێ ١٤ تاڵاوی هەمیشەیی و ٢٦ تاڵاوی وەرزی هەیە و لەو ڕێژەیە ٨ تاڵاو دۆخێکی باشیان هەیە و ٦ تاڵاوی هەمیشەیش بە ڕێژەیەکی زۆر کەم ئاوگیری کراون.
تاڵاوەکانی "دورگەسەنگی، حەسەنلوو و سڵدووز" بەهۆی دابیننەکردنی سەرچاوەی ئاو و وشکەساڵی لە کۆتایی وەرزی هاویندا لەگەڵ کێشە بەرەوڕوو دەبنەوە.
بەهۆی بارینی کەم و وشکەساڵی تاڵاوەکانی پارێزگای ورمێ به بەراورد لەگەڵ ٢ ساڵ لەمەوپێش دۆخیان خراپترە و چاوەڕوانیی ئەمەش هەیە لە کۆتایی وەورزی هاویندا دۆخیان خراپتریش ببێتەوە.
