لە پایەگایەکی سپای تێرۆریستی پاسداران لە دەوروبەری کێوی "چلچەمە"ی سەقز، سێ ئەندامی ئەو ڕێکخراوە تێرۆریستییە بە شێوەیەکی گوماناوی کوژراون و سپایش هیچ ئاگادارییەکی لەوبارەوە بڵاو نەکردووەتەوە.
بەپێی زانیارییەکان لە ماوەی دوو ڕۆژی ڕابردوودا لە پایەگایەکی سپای تێرۆریستی پاسداران لە ئاوایی "بس" لە بناری کێوی چلچەمە، سێ پاسدار کوژراون و سپا بە خەڵکی ئەو گوندەیان وتووە کە خنکاون، بەڵام هۆکاری خنکانیانی بۆ خەڵک ڕوون نەکردووەتەوە.
بەپێی زانیارییەکان هەر ئەو کاتە دەنگی تەقە لەو شوێنە بیستراوە و چەند ئامبوڵانسێک لە دوای تەقەکە و لە شوێنی ڕووداوەکە بینراون و چەند هێلیکۆپتێرێکیش بەسەر ئاسمانی ئەو ناوچەیەدا سووڕاونەتەوە و کوژراوەکانیان بۆ دیواندەرە ڕاگواستووە.
ماڵپەڕەکانی ڕێژیم و سپای پاسداران لەمبارەیەوە هیچ ڕوونکردنەوەیەکی بڵاو نەکردووەتەوە.
