کرێکارانی شارەداریی "ڕوانسەر" سەرەڕای وەرنەگرتنی هیچ جێژنانەیەک لە ماوەی حەوت مانگی سەرەتای ئەمساڵدا، دوو مانگیشه شارەداری مووچەیانی پێ نەداوە.
کرێکارانی شارەداریی "ڕوانسەر" لەهەمبەر پێنەدانی مووچەکەیان چەند جارێک سکاڵایان لەلای شارەداری و فەرمانداریی ئەو شارە تۆمار کردووە و ڕایانگەیاندووە چیتر لە بارودۆخە دژوارەدا بە بێ مووچە ناتوانن ژیان بەرنە سەر.
پێشتریش کرێکارانی "ڕوانسەر" لە ڕۆژی هەینی ١٧ی گەلاوێژ، لە ناڕەزایەتی بەرانبەر بە پێنەدانی مووچە و حەقدەستی ٥ مانگەیان کۆبوونەوەی ناڕەزایەتییان بەڕێوە بردبوو.
ئەو کرێکارانە هەتا ئێستا چەندین جار داوایان کردووە مووچەکانیان پێ بدرێت و ناڕەزایەتییان دەربڕیوە، بەڵام هیچ بەرپرسێکی پەیوەندیدار ب دەم داواکانیانەوە نەچووە.
کرێکارانی پیشە جیاوازەکان لە ئێران و کوردستان، بەهۆی پێنەدانی مووچە و حەقدەست، دۆخێکی خراپیان هەیە و لە چەندین شاری ئێراندا دەستیان داوەتە کۆبوونەوەی ناڕەزایەتی و داوای مافەکانیان کردووە.
