ڕۆژی سێشەممە ڕێکەوتی ٤ی گەلاوێژی ١٤٠١ی هەتاوی، شانۆی "شاعیرانی سەرشەقام" لەلایەن کۆمەڵێک شانۆکاری خەڵکی مەهاباد لە پارکی فەرهەنگی ئەو شارە بەڕێوە چوو.
شانۆی "شاعیرانی سەرشەقام" لەلایەن "ئیبراهیم ئیبراهیمی" نووسراوە و "سامان ئێرەمی" کاری دەرهێنان و ئامادەکردنی بۆ کردووە.
لەو شانۆیەدا "مێهران فەقری" و "ماهان فەقری" ڕۆڵی سەرەکییان گێڕاوە و شانۆکە لەلایەن خەڵکەوە پێشوازیی گەرمی لێ کراوە.
شانۆکە نەهامەتی و کوێرەوەرییەکانی میللەتێکی زیندوو دەخاتە بەرچاو و پەیامی ئاشتی و پێکەوە ژیان لەگەڵ گەلانی دیکە بڵاو دەکاتەوە.
دەرهێنەری شانۆکە باس لەوە دەکات کە ئامانجی ئەوان نیشاندانی نەهامەتییەکانی میللەتێکی چەوساوە و ئاشناکردنی خەڵک بە ڕاستییەکانە.
شانۆکاران باس لەوە دەکەن کە هۆی سەرەکیی سەرکەوتنی شانۆ لە شاری مەهاباد و بە گشتی لە کوردستاندا ئەوەیە کە پاشخانێکی گەورە لە پشتی شانۆی کوردییەوەیە.
هەروەها لە پەراوێزی بەڕێوەچوونی شانۆکەدا ڕێز لە خزمەت و ماندووبوونی هونەرمەندانی ناسراو گیرا.
پێشتریش شانۆی "شاعیرانی سەرشەقام" لە یەکەمین فێستیڤاڵی شانۆی سەرشەقامی ناڵەشکێنەی بۆکان خەڵاتی بەدەست هێنابوو.
