دیار
یەکییگ لە سەرەکی ترین سیاسەتەگانێ ڕێژیم ئەڕای وەرەو نوا بردنێ سیاسەتە دژە ئنسانییەگان وە تایبەت وە دژ نەتەوەگانێ ناو جوغرافیای سیاسی ئێران، دروس کردن شەڕ لە ناو خودێ نەتەوەگانە.
لە دریژایی دەسەڵاتداری ناڕەوای ڕێژیم جومهوری ئسلامی، فرە جار دیمنە ک ئی سیستمە وە پیلان و سیاسەتێ ناڕەوا شەڕ کورد وە خود کورد کردێە و شێوانن ناو ماڵ کورد بەشییگ بییە لە خەسار ڕەسانن وە حس نیشتمانی هاووڵاتییەیل کورد و دابڕیاین لە یەکتر.
ئی سیاسەتە گشتییە و لە بوارەیل: فەرهەنگی، جوغرافیایی، نزامی، ئابووری، سیاسی و کۆمەڵایەتی وەڕیەو چییە و چوود و هەر کامیان لەیەنەیل جیاواز وە خوەیانەو گرن، ئەڕای نموونە لە بوار فەرهەنگی و زوانی، هەمیشە هەوڵ داس ک چنیان فەرهەنگی کورد بشیونێد و جیاکاری دروس بکەید و حسییگ هاوبەش نەمینێد لە ناو کورد و ناوچە و زاراوە و جوغرافیا و تەنانەت ئایین بوودە بایس جیاکاری لە ناو کورد.
لەی ناوە ڕێژیم وە خاسی زانێد ک چ بەشییگ کەیدە ئامانج و هەدەف سەرەکی لەی کارەیلە لە بەین بردنێ هەست کوردایەتی و نیشتمان پەروەرییە تا تاک کوردییگ دروست بکەید ک بەردەی سیستم کولونیالیستی ئەوان بوو و پووچ بوود لە هەرچی باوەرێ نیشتمانی و نەتەوەییە.
لە بوارێ نزامی فرە جار هەوڵ داس سەرهەڵدانەگان و ناڕزایەتییەل لە ناو کوردستان وە شێوەی نزامی سەرکوت بکەید و لەی ناوە هەمیشە بەشییگ لە سەرکوت کەرەیل لە هازە نزامییەگام ئەو کوردەیلەنە ک خوەیان فرۆشانەسە دەسەڵات و ئەڕای لوقمەیگ نای ئامادەن هاووڵاتییەیل خوەیان بکەنە قوربانی.
ئی بابەتە هەر ئەو جوورە باس کردیمن لە گشت بوارییگ وەڕیەو چوود و ئی ڕاسییە ئەڕامان خیدەو دەر ک ڕێژیم تا چەنییگ وە دژ عەقڵیەت نەتەوەییی و هەست نیشتمانی کار کەید و دەس نیەپارێزێد لە هەر کردەوەی قیزەوەنییگ.
لە لای تریش وە بەردەوامی لە ڕێ پروپاگاندا و میدیاگانی ئەو گیچەڵەیلە تیەرێدە گووش خوەمان ک، یەسە خوەدانن ک گرفت درن لە ناو خوەدان و ئی زامە چەن بەرابەر کەی و لە بوارێ دەروونی کۆمەلگای کوردی خەیدە ژیر فشار.
پرس نەتەوە و نیشتمان ک ئەڕای گشت دسەڵاتەیل سەدەی لەیەوەری لە جوغرافیای ئێران بڤە و قەدەغە بییە، ئەڕای ئێمەی کورد وە تایبەتی خاڵ سەرەکییە و مدووی یەکگرتن و پێناسەمانە لە وەرایوەرێ دیگەری و مەبارزەی کورد و ڕێبەریەل کوردستان پێشەنگەیل ماف نەتەوایەتی و نێشتمان پارێزین.
یەیشە بیەسە بایس یە ک ڕێژیم وە بەردەوامی پێشمەرگە و ڕێبەررەیل موبارزاتی کوردستان بکەیدە ئامانج، تا ئی ڕێ و ڕێباز پیرۆزە لەبەین بچوود، هەرچەن ئی بابەتە تەنیا خیاڵە و هیچ دەسەڵاتییگ نیەتوێنید کاروان خەبات و تەقەلای کورد ئەڕای ئازادی بووسنێد، وەلی تەمام هەول خوەیان دەن تا خەسار وەلێ بڕەسنن، چ وە ترۆر بوو و چ وە کوشتن و ئعدام و ژینوساید ، چ لە بوار شەڕ نەرم و پروپاگاندا.
یەکییگ لە گەوراترین ڕەهبەرەیل بەیداخ هەڵگر موبارزەی نەتەوەیی و پارێز لە نیشتمان، شەهید دوکتور عەبدولڕەحمان قاسملووە ک توێنیمن بوێشیمن ئەندیشمەند و زانای بی وێنەی کوردە لە سەر پرس ماف نەتەوەیی و دموکراسی و بەرابەری لە کوردستان و ناوچەگە و جەهان، ک وە داخەوە وە لە ٢٢ی پووشپەڕی ساڵ ١٣٦٨ وە دەس دیپلومات ترۆریستەیل ڕێژیم ترور کریەی.
هەر چەند دوکتور قاسملوو لە لامان نەمەنییە، وەلی ئەندیشە و ڕێ و ڕێبازی ئیسکەیش بەردەوامە و نەسڵ وە نەسل کورد قەیەم لە ڕێ ئەو ڕەهبەر زانا هەڵگڕن.
ڕێژیم ک ئی ڕاسییە ئەڕای دەرکەفتێە ک دوکتور قاسملوو نەمرە و وە ئەندیشە و باوەڕی لە زەین و دڵ کورد زنێ مەنییە و پەیڕەوی وەلێ کریەی، وە بەردەوامی تەقەلا کەی ک دابڕیانییگ لە بەین ئەندیشەی ئەو ڕەهبەرە وەگەردێ نەسەڵەگان ترەک دروس بکەید.
ئەڕای نموونە ئەڕای ئی کاریشە دوێنیمن ک گشت ساڵییگ لە ساڵڕووژێ ترور دوکتور قاسملوو، ڕێژیم هونەرمەند، کەسایەتی یان مەراسمییگ ئامادە کەی ک لەو ڕووژە لە ڕووژهەڵات کوردستان مەراسم جەژن و خوەسێ وەڕیەو بووەن، ک نیشان بییەی کەس دی دوکتور قاسملوو وە یادی نەمەنییە.
وەلی لە وەرایوەر مەردوم شووڕشگەرێ کوردستان، هیچ وەخت نەکەفستنەسە ناو ئی دامەیلە و نەک ئێرنگە بەڵکە هزاران ساڵ تریش هیچ دەسەڵاتییگ نیەتوێنیذ یاد و ناو دوکتور قاسملوو لە ناو کورد لەبەین بووەید.
گشت سالییگ مەردوم کورد لەی رووژە و گشت ڕووژەگان ساڵ داخدارن و پەیمان نوو کەن ک تا سەرکەفتن کورد ڕێ و ڕێباز دوکتور قاسملوو و گشت شەهیدەگان کوردستان تا ڕەسین وە ئازادی دریژە بییەن.
