وەزارەتی دەرەوەی عەرەبستانی سەعوودی ڕۆژی چوارشەممە ١٩ی خەرمانان، جەختی کردووەتە ڕێژیمی ئێران لە ڕێگای پشتیوانی لە میلیشیا چەكدارەکان، هەڕەشە لە ناوچە دەکات و ئەم هێزانە بوونەتە هۆی ئاڵۆزی و ناسەقامگیری لە وڵاتانی ناوچەکەدا.
''فەیسەڵ بێن فەرحان'' وەزیری دەرەوەی عەرەبستانی سەعوودی لە دانیشتی وەزیرەکانی دەرەوەی یەکیەتیی عەرەب وتوویەتی: ''گەورەترین هەڕەشەیەک کە ناوچەی ئێمە لەگەڵی بەرەوڕوویە، هەوڵەکانی ڕێژیمی ئێرانە کە بە لە ژێرپێنانی بەردەوامی یاساکان، پەیماننامەکان و نۆرمە نێونەتەوەییەکان هەڕەشەی بۆ سەر ئەمنییەت و سەقامگیریی وڵاتانی ئێمە دروست کردووە''.
هەروەها ناوبراو وتوویەتی، داوا لە کۆمەڵگای جیهانی دەکەین بەنیسبەت بەرپرسیاریەتییەکانی بەرامبەر بەم شێوە کردەوانە کە هەڕشە لە ئەمنییەت و ئاشتیی جیهانی دەکات، هەنگاو بنێت.
