کوردستان میدیا: سەبارەت بە تۆپبارانی ڕێژیمی ئیسلامیی ئێران لە ناوچە سنوورییەکانی ڕۆژهەڵات و باشووری کوردستان، فەرماندەیی هێزی پێشمەرگەی کوردستان ڕاگەیەندراوێکی بڵاو کردەوە.
دەقی ئەم ڕاگەیەندراوە بەم چەشنەیە:
خەڵکی خۆڕاگری کوردستان!
کۆماری ئیسلامیی ئێران هەموو ساڵێک لە وەرزی کار و تێکۆشانی کاسبکاران و وەرزێڕ و مەڕدارانی کوێستانەکانی کوردستاندا، بە بیانووی جۆراوجۆر و یەک لەوان بوونی هێزی پێشمەرگەی کوردستان، ڕقی خۆی بەسەر خەڵکدا دەڕێژێت و ناوچەی شوێنی ژیانی خەڵکی ئاسایی دەدەنە بەر تۆپ و ڕاکێتباران. لە ڕێکەوتی ١٩ و ٢٠ی پووشپەڕدا، ناوچەکانی "سیدەکان" و "چۆمانـ"ـی داوەتە بەر تۆپباران و خەڵکی سڤیلی ناوچەکەی کردووەتە ئامانج و زەرەر و زیانی زۆری بە ژیانی خەڵک گەیاندووە و شەهید و برینداری سڤیلی لێکەوتۆتەوە. پێویستە پێش بە زیادەڕەوییەکانی کۆماری ئیسلامی لە بەزاندنی سنوور و هێرش بۆ سەر ژیانی خەڵک بگرن.
هێزی پێشمەرگەی کوردستان، پێبەندە بە پاراستنی ژیانی خەڵکی ئاسایی و ئەوە کۆماری ئیسلامیی ئێرانە کە دژی ژیانی خەڵکە و ڕقی خۆی بە سەر خەڵکی ئاساییدا دەڕێژێت.
فەرماندەیی هێزی پێشمەرگەی کوردستان
٢٠ی پووشپەڕی ١٣٩٨
