سەرۆکی مەجلیسی ڕێژیمی ئێران وتوویەتی، ئیزن نادەین ئاژانسی نێونەتەوەیی ناوکی وێڕای وڵاتانی دژبەرمان، بازنەی سیخوڕیمان بخەنە سەر و کارەکانی ئەو ئاژانسە تەواوکەری ئەو بازنە سیخوڕیانەیە بۆ سەر ئێمە.
"محەممەد باقر قاڵیباف"، سەرۆکی مەجلیسی ڕێژیمی ئیسلامیی ئێران وتوویەتی: "ئێمە لە بەرامبەر زێدەخوازیی شورای بڕیاردەر و ئاژانسی نێونەتەوەیی ناوکیدا ڕاوەستاوین و ئیزن نادەین ئاژانسی نێونەتەوەیی ناوکی وێڕای وڵاتە دوژمن و دژبەرەکانمان بازنە سیخوڕی بۆ سەرمان ساز بکەن".
"قاڵیباف" باسی لەوە کردووە، خەڵکی ئێران هەموو کاتێک ئامادەن نرخی ئینقلابی ئیسلامی بدەن و لە دژوارترین دۆخی ئابووریدا خۆڕاگر بن.
ئەو بەرپرسەی ڕێژیم لە درێژەی قسەکانیدا باسی لەوە کردووە: "دەزگای سیاسەتی دەرەوەی ئێمە هیچ کات ئیزن نادات ئاژانسی نێونەتەوەیی ناوکی دەستی ئاوەڵا بێت و هەر کارێک خۆی پێی خۆش بێت بیکات".
ئەم قسانەی بەرپرسانی ڕێژیمی ئیسلامیی ئێران نیشاندەری دوژمنایەتیی ئەوان لەگەڵ ئاشتی و سەقامگیریی ناوچەکە و جیهانە.
