بەپێی هەواڵی هەواڵدەرییەکی سەر بە ڕێژیمی ئێران، ٢١٥ قوتابخانە لە پارێزگای سنە پێویستییان بە نۆژەنکردنەوە هەیە و ٢١٣ قوتابخانەش بە گشتی خراپ بوونە و دەبێ لە نوێ دابنرێنەوە.
لە ئێستادا لە شاری سنە ٦٧، سەقز ٦٧، مەریوان ٦٤ و بانە ٦٣ قوتابخانە پێویستییان بە نۆژەنکردنەوە هەیە و ١٦ پرۆژەی نیوەکارەش لە پارێزگادا بوونیان هەیە. هەروەها ئەم پارێزگایە پێویستی بە ٣٠٠ پۆلی خوێندن هەیە.
هەروەها هیچ کام لەو ئامارانەی کە لەلایەن ناوەندی ئاماری ئێران و هەروەها ماڵپەڕ و ڕۆژنامەکانی ڕێژیمی ئێران بڵاو دەکرێنەوە باس لە ڕاستییەکان ناکەن و ئامارەکان زۆر لەوە زیاترن.
لەلایەکی ترەوە نەبوونی ئیمکانات و پێداویستییەکانی خوێندن لە ڕۆژهەڵاتی کوردستان، ڕۆڵێکی سەرەکییان لە وازهێنانی قوتابییانی کورد لە خوێندن هەیە.
