کوردستان میدیا: زۆرێک لە قوتابخانەی ناوچە بوومەلەرزەلێدراوەکانی کرماشان، دروست نەکراونەتەوە و بۆ خوێندن نابن.
فەرهاد تەجەری مۆرەی ڕێژیم لە مەجلیسدا باسی لەوە کردووە، کە قوتابخانەکانی ناوچە بوومەلەرزەلێدراوەکان، هەتا ئێستا ئاوەدان نەکراونەتەوە و بۆ خوێندنی ئەمساڵ ئامادە نین.
لە کاتی ڕوودانی بوومەلەرزەی کرماشان لە ساڵی ڕابردوودا، زۆرێک لە قوتابخانەکانی ئەم ناوچەیە وێران بوون و قوتابییان بەبێ قوتابخانە ماونەتەوە، کە ئەمە بووە هۆی ئەوەی کە بەشێکی زۆری قوتابییان ساڵێکی خوێندنیان لەدەست بدەن.
لە ڕاستای نزیکبوونەوەی یەکەم مانگی پاییز و کرانەوەی قوتابخانەکان، هەتا ئێستە زۆرێک لە قوتابخانەکانی ناوچە بوومەلەرزەلێدراوەکان ئاوەدان نەکراونەتەوە و بە قسەی بەرپرسانی ڕێژیم، قوتابخانەکان لەم ناوچەیە لەم ساڵەدا بۆ خوێندن شیاو نین.
نەبوونی قوتابخانە دەبێتە هۆی ئەوەی کە زۆرێک لە قوتابییان لە خوێندن وەدوا بکەون، یاخۆ لە نێو خێوەت و کانێکسەکاندا درێژە بە خوێندنەکانیان بدەن.
